Charla ‘Perde Peso, Gana bo Salud’ cu Bob Harms

ORANJESTAD -  ‘Perde Peso, Gana bo Salud’ ta titulo di un charla cu Bob Harms ta tene diasabra dia 1 di november di 4or pa 6or di atardi den e sala chikito di Cas di Cultura. Ta trata aki di un charla durante cual Bob Harms no solamente ta duna un testimonio con e la baha mas cu 44 kilo di forma natural, pero tambe ta duna tipnan valioso con tur hende, sin importa nan sexo of edad, pero baha di peso di forma permanente, cu fortalesa spiritual, come saludabel y movecion.

Bob Harms a logra den un periodo di 10 luna pa perde mas cu 44 kilo, dor di cambia su manera di come, disciplina mental y movecion. Di un persona cu tabata uza no menos cu 6 remedi diferente pa presion halto, kimamento di stoma y malo di sucu (diabetes), e la logra cu awe, riba orden di su dokter, e no ta uza NI UN di esakinan mas. Den su testimonio Bob Harms ta ilustra con conscientemente e la scoge pa no sigui ningun dieta special, tampoco haci operacion di stoma, sigui sistemanan di labamento di tripa of uza pilder of tablet pa baha. E la logra esaki dor di cambia su mentalidad tocante comemento, su manera di come, movecion y fortalesa spiritual pa por a mantene disciplina y persevera den su empeño. Pasobra manera e mes ta bisa, no ta trata aki di un dieta, sino un transformacion di estilo di bida.

Pa participa na e charla mester registra via telefon of SMS 742 6211 of via e-mail, bobharms1@gmail.com. Participacion ta costa solamente 25 florin pa persona, loke ta inclui un ‘booklet’ cu tipnan valioso tocante nutricion i productonan nutritivo cu por uza pa yuda mantene un bida saludabel. E charla aki ta patrocina pa Medicosmetics Aruba N.V., cu su liña di vitaminanan ‘Seven Seas’ y sucu ‘Pure Via’, cu tabata esencial den bahamento di peso di Bob Harms.