SADA ta contra e landsbesluit firma riba posicion huridico y salarial di douane

ORANJESTAD – Sindicato SADA tin problema cu e landsbesluitnan cu a wordo firma den Conseho di Minister diabierna mainta. Presidente di e sindicato Eduard Maduro a bisa diabierna atardi. E ta mustra cu a firma e landsbesluit contra palabracion haci y sin cu e sindicato a haye pa wak. “Nos no a duna nos toezegging riba dje” Maduro a bisa. Awor ta bay wak con ta para e proceso encamina prome cu gobernador firma e landsbesluit. A mustra cu e mandatario di finanzas a haci esaki como un forma di hunga politica, pa cual e sindicato ta tuma e mandatario na malo. Lo tuma contacto cu prome minister pa wak con por para e asunto aki ainda. 

E LANDSBESLUIT

E loke cu Maduro ta referi na dje, ta e landsbesluit cu ta atende e posicion huridico y salarial di cuerpo di douane manera cu NoticiaCla a publica anteriormente. Tabata awe maintaden Conseho di Minister, Ministernan Ruiz-Maduro y Bikker a firma e Landsbesluit cu ta atende cu e posicion huridico y salarial di Cuerpo di Aduana.  Segun e ministernan, desde cu e gobierno nobo a asumi e responsabilidad a atende cu e ehecucion di e Protocol firma na juli 2017 pa cual e mandatario a pone fondo disponibel den Presupuesto 2018 pa su ehecucion. E parti di legislacion ta tuma su tempo, pero awor cu Conseho di Minister a aproba e concepto, esaki lo bay Gobernador y despues lo pasa den man di Departamento di Recurso Humano pa asina e decretonan individual di cada aduanero keda concretisa.