Trabou di renobacion Bestuurskantoor tin retrazo di 3 luna

ORANJESTAD – E trabou di renobacion di Bestuurskantoor tin un retraso di por lo menos 3 luna. Minister di infrastructura Otmar Oduber a confirma pa NoticiaCla cu deni na ‘hopi contratiempo’, e trabounan lo keda cla te maart di 2019. Intencion tabata pa finaliza e trabounan e aña aki mes, despues cu a cuminsa na maart di e aña aki. A compronde di e mandatario si, cu lo entrega e prome fase (A), pa fin di januari 2019. 

COMPLICA Y CONTRATIEMPO

Loke a tarda e asunto segun Oduber, ta cu ora cu nan a cuminsa cu e trabou, a bin ripara hopi cosnan cu no tabata programa. “E dak y betonrot tabata hopi mas cu a verwacht” Oduber a bisa. A mustra cu e edificio tabata ‘den super mal condicion’. “Mester a cambia full e netwerk di coriente” Oduber a bisa. Cu tur e contratiemponan, tin un retraso di 3 luna. Pero aworaki por a nota un progreso finalmente y ta premira pues cu pa fin di prome luna di 2019, lo tin entrega di e prome parti. E mandatario no a bisa si cua ta prome y ultimo fase, ni cuanto placa e trabounan ta costa.

RENOBACION ANTERIOR

Por corda con ora cu gabinete Mike Eman I a sinta, nan a opta pa, contrario na gabinete Oduber I y II, ‘renoba’ Bestuurskantoor y drenta y goberna eyden, envez di bay usa e edificio cu gabinete Oduber a usa cu ta e actual edificio unda cu ATA y Raad van Advies ta ubica. Por corda con e tempo ey, a usa un cantidad di boluntario pa haci e trabou inicial. Despues a haci un otro tipo di renobacion, pa finalmente toch traha un edificio completamente nobo, modern cu ta e actual ‘Cocolishi’. 

DETERIORO

Ora cu gabinete Wever Croes a sinta, nan tambe a opta pa keda den Bestuurskantoor, pero tabata notable cu mester a haci algo cu e edificio pa su existencia keda garantisa. Un di e facilidadnan cu tabata casi cay den otro, tabata e centro di prensa unda cu gobierno tabata tene su conferencianan di prensa. Y pa algun tempo prome cu e gobierno anterior a baha, ya a ‘condemn’ e facilidad ey. Y na maart di e aña aki, gobierno actual a pone pa e trabounan di ‘renobacion’ a inicia. For di e tempo ey, e entrada a cambia caba, pero a traha esaki cu un velocidad hopi lento. Y awor ta conoci pakico a y ta durando asina hopi pa e renobacion keda cla.