Morto di dama riba bapor crucero na Aruba tin atencion di prensa internacional

ORANJESTAD – Prensa internacional, primordialmente Mericano ta dunando e noticia di morto di e turista abordo di un crucero na Aruba e siman aki, hopi atencion. Practicamente tur cadena principal di noticia Mericano a raporta e noticia. Ta trata di e noticia di e dama di 52 aña cu a wordo haya morto riba un boto di salbabida di e crucero Royal Princess diamars mainta. 

CAUSA DI MORTO

Mientras cu na Aruba ta papia di un caso di asesinato, oficialmente autoridad di tanto Merca (FBI) como Aruba ta papia di un morto ‘no natural’. Esaki pasobra segun e vocero di ministerio publico, Ann Angela, e investigacion mester determina si e dama a bula for di e deck na di 16 piso y cay of si el a wordo pusha. Basa riba esaki, e casa (cu ta na Aruba), no ta deteni y ta pendiente e investigacion. Unabez cu e investigacion determina e causa exacto di e morto, e investigacion ta haya un dimension nobo y por actua diferente.