Comision di ‘inclusion’ instala pa efoca riba nos hendenan special

ORANJESTAD – Un ‘comision di inclusion’mester bay  enfoka riba e derechonnan y calidad di bida pa nos hendenan special. Asina prome minister di Aruba Evelyn Wever a informa diahuebs mainta durante un conferencia di prensa. E tin representante di varios departamento di gobierno y minister. 

META  

“E meta di e comision ta pa inventarisa loke ta e necesidadnan. Nos ta spera cu pronto nan entrega nan plan di ehecucion pa Gobierno den cua ta indica loke Gobierno mester haci den termino corto, mediano y largo pa asina yena tur buraco cu tin habri ainda”, Wever a duna di conoce. 

LIFE CYCLE APPROACH

Gobierno ta tuma esaki como un “Life Cycle Approach”, Enfoke di Ciclo di Bida di un persona. Esaki ta cuminsa desde cu un persona nace cu un limitacion fisico of mental. For di aki caba mester tin un bon sistema na luga pa asisti e mayornan y of e cuidador di e muchanan. E siguiente stap ta inclui e muchanan aki na scolnan adecua y ekipa pa cuida muchanan special. Tambe mester bin un bon plan pa despues di scol e muchanan aki tin un luga bon pa keda mientras nan mayornan ta traha. 

OFISHI

Ora nan drenta e edad hoben, mester percura tambe pa despues cu nan caba scol, nan por wordo inclui den un scol di ofishi. Tambe mester studia e posibilidad pa nan drenta scolnan regular.  

Den nan edad di adulto, mester inclui nan den e mercado laboral. Algo cu lo no bay ta facil teniendo cuenta cu e presion cu tin awendia den comercio cu un economia stagna. Sinembargo Gobierno di Aruba, pa medio di e comision aki cu lo studia tur posibilidad, lo yuda den inclusion di nos hendenan special den e mercado laboral.      

Despues di e face laboral, ta bin tambe e parti di cuido di salud y vivienda.