Minister na Maduro: Lo no ‘overrule’ decision di director di douane

ORANJESTAD – Gobierno lo no interveni den decisionan tuma pa e  director contra e douanero Eduard Maduro y tampoco riba e asunto di reemplazo di e director Ricky Croes. Asina e mandatario responsabel pa e departamento Xiomara Ruiz Maduro a indica diahuebs mainta durante un conferencia di prensa. Cu esaki, palabra awor ta keda na Maduro y e sindicato, cu a duna gobierno 2x24 ora pa tuma dos decision. Algo cu e mandatario a bisa awor di lo no haci. 

OVERRULE

Contrario na e maneho di e minister anterior Angel Bermudez, Ruiz a bisa cu e no ta bay ‘overrule’ decision di director di un departamento, pasobra esaki lo ta contra regla di bon gobernacion. E mandatario a referi na e actuacion di pasado di Bermudez cu si tabata haci esey, fuera di mete den operacion di douane. Algo cu Ruiz a bisa di no kier y lo bay haci, pasobra pesey tin un director na cabez di e departamento. 

ATENCION

E mandatario a refuta e acusacion cu no tin atencion pa e departamento y of sindicato di douane SADA. A sigura cu tin un consehero dedica pa atende cu asuntonan di douane y tambe e parti sindical. A mustra cu periodicamente ta reuni tanto cu e director y e sindicalista, pero no ta mete den cosnan operacional. Pesey tin un director na cabez. “Ami no ta funciona asina” Ruiz a sigura prensa diahuebs mainta. 

RESPET

Ademas e mandatario a mustra cu ta un falta di respet e forma con e sindicalista ta anda cu informacion y kier presenta cosnan den publico nacional, envez di cana e caminda corecto pa bringa su asuntonan. “Falta di respet ta hunga un rol grandi”, Ruiz a bisa, refiriendo na e hecho cu e sindicalista kier sinta riba stul di minister y bise kico pa haci, y e kier pa e minister sinta riba stul di e director pa e dicidi kico ta sosode. 

CARTA

E carta cu e mandatario a ricibi, a haya contesta diahuebs mainta, conforme e ‘ultimatum’ poni cu e deadline cu e sindicato SADA a pone di diahuebs 4’or di atardi. A mustra e sindicalista den e carta cu tin caminda corecto pa cana y atende cu su carta disciplinario, manera via corte. “Pero no etala esaki riba tereno nacional”, Ruiz a bisa. Y finalmente a bisa cu e no por ‘overrule’ e director pasobra esaki lo ta contra regla di bon gobernacion. Como tal ta rechasa e dos peticionan y cu Maduro mester atende cu e asunto di otro forma. NoticiaCla a busca reaccion di e sindicalista pero no a logra ainda.