Situacion medico di alumno cu a cay for di piso di scol, ta mustra serio

ORANJESTAD – E alumno cu dialuna mainta a cay for di e di dos piso di Maria College Mavo, ta den un situacion serio. Fuentenan yega na e alumno, a confirma na NoticiaCla.com dialuna atardi, cu e mucha muher (no a identifica e persona ainda) lo a fractura algo den su columna vertebral, y lo tin sangramento interno. E motibonan exacto di kico a pasa, ainda NoticiaCla.com no a logra confirma. Den contacto cu polis, NoticiaCla.com a wordo informa cu e investigacion ta uno delicado y cu ainda e ta andando. Lo a evalua ki informacion riba e caso lo duna.

Tabata dialuna mainta cu autoridad policial a haya e melding di un caso cu e alumno femenino lo a cai di e di dos piso di e scol. Loke NoticiaCla.com a raporta inicialmente ta cu autoridad competente ta investigando e caida di un alumno di Maria College Mavo dialuna mainta, pa sa kico e motibo exacto ta. Esey ta pasobra tin duda riba e motibo di e suseso. Loke si ta conoci ta cu e alumna a herida su mes formalmente na su lomba y barica. Mientras cu tin varios version pa e caida, cu ta varia den intento di pone fin na bida, te na pushamento y posibel chansamento cu a bay robes, e hecho ta keda cu e persona a keda seriamente herida y a wordo transporta pa hospital. Riba potret por mira  mustra e momento cu personal di ambulance ta transporta e alumno paden di Eerste Hulp. E otronan ta indica e situacion na e scol.