Parlamento a desaproba cuenta annual di 2016 diaranson anochi

ORANJESTAD – Parlamento diaranson anochi a desaproba e cuenta annual di 2016, cu un votacion di 11 voto contra y 7 pro. Esaki kier men cu mayoria den e caso aki no ta sostene e contenido, cu ta nifica cu gobierno tin cu bay ahusta esaki pa e por keda aproba. NoticiaCla a compronde cu tabatin basta bay bin henter dia, pa asina logra convence suficiente parlamentario pa aproba e cuenta. Esaki sinembargo no a logra. Constantemente tabata suspende e reunion, pa duna chens pa parlamentarionan reuni internamente. 

DUÑA SEÑAL

Segun e parlamentarionan den coalicion (esnan cu a desaproba e cuenta annual), nan kier manda un señal afo cu no ta sin mas ta aproba cuenta annual manera a bin ta haci pa hopi aña. E ta un situacion fastioso pa e gobierno actual pasobra cu desaprobacion di e cuenta annual, ta pone cu gobierno actual tin cu bay traha awor pa wak con ta drecha un cuenta cu nan no a traha, sino e gabinete anterior. Coalicion den parlamento a mustra cu nan a desaproba asina e maneho di e gobierno anterior, unda cu a bin nota cu varios cos a sosode den un forma incorecto y cu a keda resalta den e cuenta annual. 

MINISTER

NoticiaCla a compronde cu e mandatario responsabel, Xiomara Ruiz Maduro no a keda mucho contento, ya cu e ta pone cu mester bay dedica tempo y esfuerso na regla un cuenta annual di nobo, siendo cu no mucho cos por cambia. Ta tuma tempo cu por a usa pa otro cos, pa bay drecha e cuenta annual aworaki. Traduci den un forma mas simple, trabou di tanto controlaria general ta para un rato pa asina duna chens pa ‘drecha’ esun di 2016. Cu ne, otro trabounan tambe ta core risico pa para.