Wever: Bureau integridad mester ta operacional dentro di 6 luna!

ORANJESTAD – Bureau integridad mester ta operacional dentro di 6 luna. Asina prome minister di Aruba, Evelyn Wever Croes a bisa den un comunicado diaranson. E Buro lo ta encarga cu atende cu kehonan di comunidad riba funcionamento di e aparato gubernamental. Señora Amalin Flanegin ta e persona adecua cu a wordo apunta pa set up e buro aki kende ta trahando incansabelmente pa logra e meta den e tempo cu a wordo acorda. Den 6 luna, Buro Integridad mester cuminsa funciona pa ricibi e prome registracion di kehonan y haci e prome investigacionnan.

Ainda Buro Integridad no tin un number di telefoon conoci y niun tipo di informacion con pa localisa nan pasobra tur esaki ta den proceso ainda mientras cu e trabou primordial di señora Flanegin ta pa institui un organisacion y un luga na unda e oficina lo ta ubica como tambe busca esnan cu lo traha den Buro Integridad. Trahadornan lo sali primeramente for di e departamento di Gobierno mes teniendo cuenta cu no tin placa pa busca trahadornan pafo di Gobierno.