Minister Ruiz ta trahando riba contesta pa sindicato SADA

ORANJESTAD – Minister di finanza y esun responsabel pa cuerpo di douane, Xiomara Ruiz Maduro a confirma na NoticiaCla cu el a ricibi e carta di sindicato di douaneronan SADA, cu e ultimatum di 2 biaha 24 pa un contesta pa revoca e carta di medida contra e presidente di e sindicato. “Mi a ricibi e carta y mi ta atendiendo esey” Ruiz a bisa den un reaccion breve pa NoticiaCla diaranson. 

PROBLEMA ETERNO 

Segun e mandatario, e ta na altura di e problema entre SADA y e director y a mustra cu ta algo di basta tempo. Mes momento por a compronde cu no ta mucho contento cu un ultimatum asina pa un minister cu tin asina hopi cos hacienda pareu. “Pero mi por bisabo cu mi ta atendiendo e asunto” e mandatario a sigura e portal aki. E no a bisa kico e contesta ta bay ta si, pues si ta revoca e carta si of no. 

E SITUACION

Tabata diamars anochi cu sindicato di douane SADA a pidi minister di finanza Xiomara Ruiz Maduro pa dentro di 2 biaha 24 ora duna e director di douane Ricky Croes orden pa revoca e rapport contra e presidente Eduard Maduro. Asina Maduro a confirma pa NoticiaCla diamars anochi. “ Tambe a informe di e mocion di desconfiansa cu miembronan a trece contra e directeur” Maduro a sigui bisa e portal aki. “Si pa diahuebs 4’or di atardi nos no haya reaccion di e minister cu e rapport ta wordo ingetrokken, nos lo yama otro reunion pa dicidi kico ta bai ta e siguiente pasonan” Maduro a finalisa bisando.

E ACCION

E carta disciplinario cu e presidente di sindicato di douane SADA a haya, esta Eduardo Maduro, ta un falta di respet pa sindicato. Asina Maduro a bisa den un reaccion na prensa despues di a atende cu e miembronan durante un reunion di dos ora pafo di e base di douane na Eagle awe mainta. Durante dos ora, Maduro a dirigi su mes na e miembronan douanero pa atende e asunto cu el a haya su mes aden. “E miembronan no ta acepta ningun tipo di intimidacion mas” Maduro a bisa, y a mustra cu e miembronan ta sostene nan presidente.