Autoridad Mericano yudando cu investigacion di e morto riba bapor crucero

ORANJESTAD – Autoridad Mericano ta yudando cu investigacion di e morto riba e bapor crucero Royal Princess. Asina vocero di ministerio publico Ann Angela a confirma pa NoticiaCla diaranson mainta . Manera ta conoci, ora cu e bapor crucero a drenta Aruba diamars mainta, a informa autoridad di e caso lamentable. E momento ey no tabata cla ainda kico exactamente a sosode. Despues den dia detayes di e caso a cuminsa bira conoci, y tabata papia despues di un possible caso di asesinato, aunke autoridad local tabata cuidadoso cu esey. 

CURPA CONFISCA AINDA

Mientrastanto, Angela a informa e portal aki cu e curpa di e victima di e caso tragico riba e bapor crucero, ainda ta confisca y den poder di ministerio publico. “ Mi por bisa bo cu autopsia a tuma lugar caba. E curpa no a wordo duna liber ainda. E ta sigui den beslag”, Angela a bisa. Mes momento a mustra cu no tabatin ningun detencion haci. ”Tin contacto cu autoridadnan Mericano” Angela a sigui bisa. Tambe Angela a confirma cu ayera tabatin investigacion intensivo abordo di e barco.  

E CASO

Mientrastanto e informacion a alcansa nivel internacional. Un pasahero cu tabata abordo di e bapor crucero, cu a pidi pa keda anonimo, a duna un testimonio di e suceso di diamars na Cruise Law News, ora cu e bapor a drenta waf na Aruba. “Un dama riba Royal Princess a wordo pusha of a cay di e lido deck 15 of 16 piso riba un boto di salbabida#2 pa 4 or di marduga. El a fayece instantaneamente. E scenario tabata horrible” e pasahero a declara. Segun e portal, pasaheronan a keda informa di e incidente ora cu nan a tende un anuncio 4:30am pidiendo pa e personal di seguridad acudi na e deck 7 banda di e boto di salbabida number 2. Ora cu e bapor a yega Aruba, e capitan a haci e anuncio cu autoridad di Aruba lo a bin abordo y cu ningun hende por a baha te proximo aviso.