Banco di Caribe ta celebra 35 aña di existencia na Aruba awe

Posted on 11/14/2018 10:24 am AST | Updated on 11/14/2018 10:24 am AST

ORANJESTAD - Awe dia 14 di november 2018 directiva, empleado y cliente ta celebra 35 aña di Banco di Caribe na Aruba.. Dia e banco a habri su portanan na aña 1983 a cuminsa cu 6 colega ofreciendo servicio basico di caha y financiamento na esnan cu mas tabata tin mester. Cu desaroyo di tempo banco no a para keto y a sigui e desaroyonan, ampliando su servicio y productonan pa cumpli cu necesidad di e cliente. Tecnologia a pone cu Banco di Caribe a instala diferente ATM riba e isla y a introduci mashin di pago pa su clientenan comercial. Cu e avance den e mundo di digitalisacion Banco di Caribe a añadi e servicio di ‘online banking’ pa facilita transaccion cu banco riba distancia na cada momento desea. 

Cu tur e cambionan mester a tuma mas empleado den servicio pa por sirbi e cliente cu e atencion cu e merece. Den transcurso di añanan e cantidad di colega a aumenta di 6 te 78 y awe nos ta gradici e colega, Sra. Sira Ramada cu ya pa 33 aña ta traha na Banco di Caribe cu dedicacion na e cliente y colega. Ademas, 14 di november ta un dia special riba cua ta celebra cumpleaños di e fundado di Banco di Caribe, Sr. Eddie de Kort, cu awe a cumpli 80 aña.

Banco di Caribe ta gradicido di por sirbi mercado di Aruba y conscientemente ta duna bek na comunidad mediante varios patrocinio y donacion. Esaki pa cumpli cu nan deber di responsabilidad social pa logra un comunidad disciplina, educa y respeta. Directiva di e banco ta masha orguyoso di cumpli 35 aña y tin fe cu lo cumpli hopi aña mas sirbiendo comunidad di Aruba.

  • Powered by SETAR