Premier Eman: Mester aloca fondo pa cumpli cu pago di gelijkbedrag awor

ORANJESTAD – Pa por cumpli cu e promesa haci pa paga e gelijkbedrag y bashie premie, gobierno mester haci ehercicio pa por aloca e fondonan necesario. Esaki ta pensamento di premier Eman na NoticiaCla.com dialuna mainta. Eman a confirma cu e suma di bashi premie y gelijke bedrag (12 miyon) no tabata presupuesta. Pero gobierno ta bay haci todo por todo, pa wak si por logra saca e placa un forma of otro pa wak si fin di aña nan por haye, e mandatario a sigura NoticiaCla.com. Asina Eman por toch cumpli cu e promesa haci e.o. na e señora Hyacintha Thijsen cu siman pasa ainda a sinta cu e mandatario riba e topico aki. Thijsen a entrega un manifiesto na prome minister Eman diaranson siman pasa pa e.o. haya esaki paga bek, y tambe reduci tarifa di coriente. Diabierna siguiente, Eman a priminti Thijsen cu e lo cumpli cu esey. Por lo menos segun Thijsen.

Thijsen, - despues di a combersa cu e mandatario den su oficina-, a bin pafo di Bestuurskantoor pues y bisa cu premier Eman ‘a priminti’ cu lo paga bashie premie y gelijkbedrag atrobe. NoticiaCla.com a puntra Eman dialuna, con tin cu tuma e palabranan aki, y si nan ta cuadra cu loke realmente Eman a bisa. “E la interpreta mi bon” Eman a bisa di e declaracion di Thijsen. “Cu un compromiso solido pa haci'e (pago di gelijkbedrag y bashi premie) posibel”.    

Eman a mustra si cu e asunto di e pago di gelijkbedrag y bashie premie ta mas compleho cu hopi ta kere. E ta suma grandi cu tabata forma parti di un discusion mas grandi riba e pensioen. Sinembargo cu e suma specifico aki no tabatin claridad, si e tabata part di e henter e negoshacion unda cu a aumenta edad, cambia prima y storting adicional di gobierno (di 170 miyon florin). E mandatario a bisa cu ta durante combersacion cu e.o. bo boluntad di OPPA y sindicato SEPPA, no tabatin claridad ariba. “Bon gobernacion ta exigi di bo pa por percura pa por garantisa un persona cu un cos cu e la kere cu e tin derecho riba dje, y niun hende a bise cu e no ta haye mas, pa e por conta riba dje tambe”.

“Mi tin hopi confianza cu nos lo sali for di dje pasobra e ta un punto cu no ta esun di e pantaya mas grandi” Eman ta bisa, refiriendo na e suma grandi cu mester a inverti aden (di 170 miyon florin) y otro asuntonan pendiente cu mester a atende cune manera menciona anteriormente. E suma cu Eman ta papia di dje ta 12 miyon.

Pa loke ta e forma con e mandatario tin pensa di aloca e fondonan “Fin di aña semper ora bo tin un presupuesto cu no a wordo ratifica, - por ehempel investeringnan cu bo no por haci tanten bo no tin un presupuesto ratifica-, bo ta haya cu sumanan cu a wordo aloca pa inversion, no a wordo utilisa” Eman a bisa. Tin biaha tin otro sumanan cu no a wordo utilisa, cu fin di aña semper ta wordo presenta durante un presupuesto supletorio. “Aki ta haci un cross section entre sumanan cu no a wordo utilisa y sumanan cu ainda ta necesario pa sera e aña” Eman ta finalisa bisando. E mandatario a sigura tambe cu no tin un diferencia di opinion cu colega minister (di finanzas) Angel Bermudez, cu a bisa cu e suma ‘no tey’ pa paga e loke cu e pensionadonan tabata kier bek. “(nos ta) riba mesun liña. Semper tin e reto cu bo tin cu busca e fondonan pa por cumpli cu esaki” Eman a finalisa bisando.