Sindicato cu ultimatum pa gobierno pa revoca carta contra su presidente

ORANJESTAD – Sindicato di douane SADA a pidi   minister di finanza Xiomara Ruiz Maduro pa dentro di 2 biaha 24 ora duna e director di douane Ricky Croes orden pa revoca e rapport contra e presidente Eduard Maduro. Asina Maduro a confirma pa NoticiaCla diamars anochi. “ Tambe a informe di e mocion di desconfiansa cu miembronan a trece contra e directeur” Maduro a sigui bisa e portal aki. “Si pa diahuebs 4’or di atardi nos no haya reaccion di e minister cu e rapport ta wordo ingetrokken, nos lo yama otro reunion pa dicidi kico ta bai ta e siguiente pasonan” Maduro a finalisa bisando.

E ACCION

E carta disciplinario cu e presidente di sindicato di douane SADA a haya, esta Eduardo Maduro, ta un falta di respet pa sindicato. Asina Maduro a bisa den un reaccion na prensa despues di a atende cu e miembronan durante un reunion di dos ora pafo di e base di douane na Eaglge awe mainta. Durante dos ora, Maduro a dirigi su mes na e miembronan douanero pa atende e asunto cu el a haya su mes aden. “E miembronan no ta acepta ningun tipo di intimidacion mas” Maduro a bisa, y a mustra cu e miembronan ta sostene nan presidente. 

MOCION Y CARTA

Durante e reunion, e miembronan a vota pa varios asunto, entre nan un mocion di desconfiansa contra nan director Ricky Croes. Ki efecto esey lo tin, no ta conoci si. Pa loke ta e carta ricibi, Maduro a bisa di lo bay corte cu esaki y ta evaluando pa bay corte pa bringa e carta aki pasobra no ta bay tuma esaki sin mas. Ta evaluando e situacion cu un hurista aworaki pa wak ki paso pa tuma. Maduro no ta di acuerdo cu e director kier ‘silencia vakbond’. 

DIRECTOR

Mientrastantoe director di Douane Ricky Croes ta lamenta e postura di e sindicato pa tene un accion diamars mainta, basa riba un acto disciplinario tuma contra un trahado y no sindicato. Croes a confirma na NoticiaCla cu Eduardo Maduro berdad a haya un carta cu ta hala su atencion pa a saca informacion di operacion di douane afo. Pero a mustra cu esaki no tabata den su calidad di sindicalista, sino un douanero. Pero cu sindicato ta usa esaki y tilda cu ta silenciando e sindicato siendo cu e saki no ta e caso. A mustra cu si Maduro tin problema, por acudi na su chef cu lo atende cu e asunto mas aleu. Pa loke ta e infraccion cometi, Croes a mustra pues cu Maduro ‘no mag di papia di cosnan di trabou, pafo’. Y pa esey el a haya un carta. 

OPERACION

E operacion di douanero a sufri awe mainta segun Croes, aunke a purba wanta esaki na un minimo. Tur departamento, esta aeropeurto, waf y na base mes a keda afecta pa e reunion di dos ora. A mustra cu basa riba e LMA, esnan cu a ‘reuni dos ora’ lo aplica e regla di ‘no work, no pay’ pa nan manera ta custumber.