Michelle Obama den su buki: Mi no ta postula pa bira presidente!

WASHINGTON – Hopi democrata tabatin speransa secreto ainda cu lo por tin un presidente Obama nobo, pero mundo no mester spera esey. “Lagami ta hopi cla. Mi no tin pensa di postula mi mes pa candidato presidencial Mericano!” Michelle Obama ta bisa den su buki di su bida, ‘Becoming’. “Nunca mi tabata un amante di politica y e experiencia di e ultimo 10 aña ey no a cambia mi pensamento” Obama a bisa.  E buki a keda publica awe den 24 idioma rond mundo. E ex prome dama ta haya un suma gigantesco tambe pa dos buki (uno di dje y uno di su casa cu tin cu wordo publica ainda), balora na 57 miyon euro. Esey ta 20 miyon mas cu Clinton a haya pa nan memoires. Hasta pa su tour pa bende su buki, tin un record. Tin un presentacion na London unda cu a ofrece un ticket pa 80 mil euro. E interes pa e buki aki ta inmenso. E rabia cu Michelle Obama a genera pa e actual presidente Mericano Donald Trump tambe ta yuda. Segun Obama, e teoria di Trump cu Obama a nace den exterior y como tal no tabatin derecho di bira presidente, a pone nan bida den peliger. Esaki pasobra hende lo a haya rabia riba dje y por a bin y  tire mata. “Donald Trump a hinca mi famia den peliger y esey mi no ta pordone nunca!”.