Durante control a gara supermercado cobrando BBO/BAZV/BAVP dobbel

ORANJESTAD – Durante un control di supermercadonan a gara un supermercado cobrando BBO/BAZV/BAVP dobbel. Awe un bez mas e team di control forma pa Departamento di Asuntonan Economico Comercio y Industria (DEZHI), Cuerpo Policial Aruba (KPA) y Departamento di Salubridad Publico (DVG) a haci nan control y esaki a tuma lugar na diferente supermercado den Santa Cruz. E team a haci control riba prijs di productonan cu ta forma parti di e canasta básico además a hiba control riba e parti sanidad y higiëna y sanidad di e supermercadonan. Tambe a controla si e establecimiento tin tur e permisonan necesario na ordo regla pa nan por opera.

CONTROL

A controla na tres supermercado den Santa Cruz,   Mundo Nobo Supermarket y  Komi Supermarket  a cumpli cu prijs máximo di producto di canasta básico, regalanan di higiëna y sanidad. 

HUA FENG A COBRA IMPUESTO DOBBLE

Por ultimo e team a haci control na HUA FENG Supermarket y a constata cu riba e productonan di canasta básico ta cobra BBO/BAZV/BAVP dobbel, tanto riba reki y tambe ora bo bay paga na caha esaki ta inclui. A atende cu e gerencia y instruí nan pa haci e cambio de inmediato den e prijsnan di e productonan di canasta básico y Departamento di Asuntonan Economico Comercio y Industria(DEZHI) lo bin controla bek.