Aruba ta condiciona sosten na St Maarten riba impasse contra Hulanda

ORANJESTAD – Aruba ta sostene St Maarten den su intento pa resolve e impasse cu e tin cu Hulanda. Pero cu sosten, Aruba ta hopi specifico ki tipo di sosten e ta dispuesto pa duna. Como tal a duna su minister plenipotenciario di Aruba na Hulanda ok pa durante reunion di conseho di minister di Reino, sostene St Maarten den su intento pa haya derecho riba e asina yama ‘intern appèl’ (lesa aki kico un intern appèl ta). St Maarten, sinembargo ainda no a haci e peticion ey. Mientras cu Aruba no conoce e discusion ‘inhoudelijk’ entre St Maarten y Hulanda, Aruba pues ta dispuesto pa sostene St Maarten cu sosten pa e isla haya un ‘intern appèl’.

Den combersacion cu NoticiaCla.com, premier Eman a confirma cu e la tuma contacto cu prome minister Sarah Wescott Williams, cu Aruba ta sostene St Maarten riba su sosten y a mustra tambe cu si St Maarten kier sosten pa exigi pa haya conseho di Raad van State, locual Aruba tampoco no a haya. “Esaki si St Maarten a pidi y esey nos gevolmachtigd minister a sostene tambe. Pero lamentablemente esey tambe no a wordo concedi” Eman a bisa. Eman ta recorda cu e tambe a haye den un situacion asina recientemente ora cu Hulanda tabata den impasse cu Aruba, y unda cu Aruba a bringa Hulanda riba e aanwijzing cu e la haya. Na e occasion ey tambe Aruba a pidi Hulanda pa tanto derecho riba appèl

Manera cu NoticiaCla.com a raporta den fin di siman caba, e politico di St Maarten cu ta poni pa bira e proximo prome minister di e isla, tabata cla pa bringa Hulanda directo, cuminsando dialuna   den parlamento. Su partido a yama un reunion di urgencia pa asina debati e topico aki y wak con St Maarten por bringa Hulanda y e aanwijzing cu nan a haya diabierna ultimo for di Hulanda. Segun Heiliger, esaki no ta posibel, y cu Hulanda ta lubida cu St Maarten no ta colonia mas di dje. No ta conoci exactamente con St Maarten lo y por bringa Hulanda den e caso aki, pero lo tende mas dialuna atardi despues di e reunion di parlamento, cu tabata poni pa cuminsa 2 or dialuna merdia.

Diabierna ultimo gobierno di Hulanda a duna gobernador di St Maarten un ‘aanwijzing’ riba orden di gobierno di Reino Hulandes. E aanwijzing ta pone cu gobernador tin cu para e proceso di nombracion di ministernan di e gabinete nobo, incluyendo esun di prome minister proximo. Motibo di e aanwijzing ta pa sigura cu e investigacion riba integridad riba gobierno di St Maarten ta completa, y pa sigura cu ningun di e candidatonan pa e proximo gabinete, no ta cumpli cu e rekisitonan.

E rapport a wordo traha for di 2013, despues cu St Maarten a haya un aanwijzing caba pa haci e investigacion aki. E resultado a keda cla na augustus di e aña aki, y a pasa su proceso, te cu e la wordo trata den paramento hulandes. E rapport a confirma cu tin falta grandi den e integridad di gobernacion di e isla.

Despues di e ultimo eleccion na St Maarten dia 29 di augustus ultimo, a logra forma un gobierno pa e isla. Pero Hulanda kier ta sigur cu no tin ningun duda den integridad di esnan cu lo carga e funcion di minister. Entre otro pa evita cu dado caso un persona ‘no integro’ representa Reino Hulandes den exterior. NoticiaCla.com a raporta riba esaki caba den curso di dia diabierna ultimo. E aanwijzing di diabierna, ta pone cu gobernador no por firma ningun ‘landsbesluit’ pa minister te ora cu e haya ok di gobierno di Reino Hulandes.