Minister ta sigura cu gasoline su prijs no ta bay subi!

ORANJESTAD - Prijs di gasoline no ta bay subi. Asina minister di economia Xiomara Ruiz Maduro a sigura NoriciaCla dialuna anochi. Cu esaki e ta aclarea y disputa contenido di un carta cu a ‘lek’ den media indicando otro. Manera ta conoci, tur di dos diamars di luna, gobierno ta anuncia prijs di e productonan petrolero, incluyendo gasoline, cu ta cambia e diaranson siguiente. Y como tal, e carta su contenido ta duna indicacion e ora cu e prijs lo subi mayan. Algo cu e mandatario pues a refuta.  “ Mi a tuma nota cu tin un carta cu no ta destina pa publico ta circula den media cu e informacion cu gasoline ta subi. Esaki no ta berdad. Gasoline su prijs no ta bay subi. E prijs di gasoline ta bay baha” Ruiz a sigura e portal aki.

CONTENIDO DI CARTA

E mandatario ta sigui clarifica e contenido di e carta. “ E contenido di e carta aki ta un instruccion na douane pa adapta e accijns cu den tempo di e crisis petrolero na 2007 a wordo subsidia pa Gobierno cu 10 cent. Cada bes cu e prijs di producto petrolero baha, Gobierno ta tuma un parti te ora cu por yega na e 10 cent. E situacion financiero di Aruba lamentablemente no ta brinda espacio mas pa sigi absorba e subsidio aki y pesey poco poco ta tuma e subsidio bek” Ruiz a sigui bisa. “ Mi ta lamenta cu e carta aki ta wordo saca for di departamento di gobierno pa media pa esnan cu menos bon intencion. E carta cu e informacion oficial ta wordo saca for di Departamento Economico y no for di Aduana”. Mas lat den dia e anuncio mes di prijs nobo lo bira conoci.