CITGO ‘porfin’ a priminti gobierno claridad riba nan situacion

ORANJESTAD – Gobierno diabierna haya promesa di CITGO di lo haya contesta riba dos carta cu gobierno a manda pa nan algun tempo atras. Asina minister president Evelyn Wever Croes a sigura NoticiaCla dialuna mainta durante un conferencia di prensa. Prome cu esey, parse cu gobierno di Aruba y CITGO tabatin un problema di comunicacion. Esaki pasobra gobierno tabata manda carta pa CITGO, sin haya contesta. CITGO mientrastanto a bin Aruba diabierna parse, pero gobierno no a reuni cu nan. Y segun Wever, e tabatin su motibo.

PAKICO NO A REUNI

Segun prome minister Evelyn Wever , ‘cos no ta bay asina’, manera cu CITGO kier. Esey tabata palabra di Wever mes.  Mester a compronde di e splicacion cu CITGO no por reuni ora cu nan ta haya ta bon cu gobierno, y esey ta inclui, ‘aparece na Aruba’ y pensa cu gobierno lo ricibi nan mesora. Wever a splica NoticiaCla pues cu CITGO lo tabata na Aruba diabierna pero pasobra e no tabatin su consehero cune, no a reuni cu e compania Mericano. ‘Y ami tampoco por a atende cu nan” Wever a sigui bisa. Pero por lo menos a haya promesa di CITGO cu lo haya contesta riba e carta.

CARTANAN

Gobierno di Aruba a manda CITGO Petroleum no un, sino dos carta algun tempo atras, caminda a pone nan ‘riba termijn’, esta pa contesta riba e incertidumbre cu tin ainda. Algun siman atras, prome minister Wever a bisa cu CITGO, contrario na nan promesa di bin bek despues di un luna (na augustus) y bisa kico exacto nan ta bay haci, no a cumpli cu esaki. Esey ta pone cu ainda gobierno ta den incertidumbre di kico por spera Aruba cu e rehabilitacion di e refineria. A manda nan carta pero no a haya reaccion y awor a manda nan un di dos. Y awor supuestamente lo ricibi un contesta.