Gobierno buscando forma pa reduci 10 miyon extra na gasto di personal pa 2019

ORANJESTAD –  Entre gobierno di Aruba y e colegio di supervision financiero di Aruba (CAFT) tin un diferencia riba cuanto e reduccion di gasto di personal pa 2019 mester ta. Prome minister di Aruba Evelyn Wever a bisa NoticiaCla dialuna mainta cu pa presupuesto 2019, gobierno a logra reduci gasto di personal cu 4 miyon. Pero CAFT kier pa gobierno reduci esaki mas ainda te na 14 miyon. Pues tin un diferencia di 10 miyon. Pa Wever, esaki kier men cu a tuma dos decision pa yega na e 10 miyon ey y ‘overbrug’ e suma final. E intencion tabata pa 2018 esaki ta 12 miyon, pero e mandatario no tabata na altura si esaki a keda logra. 

DOS DECISION 6

Un di e decisionan a keda anuncia awe mainta publicamente cu ta e eliminacion di e overtolligheidspoel. Su eliminacion, den teoria, lo mester genera 7 miyon, cu ta laga 3 miyon ainda pa yega e 10 miyon cu CAFT kier. Problema ta cu pa por genera e suma basa riba e eliminacion di e overtolligheidspoel, tur hende mester bay di acuerdo pa bay, y nan ta haya 6 luna pa haci tal. Ta despues di e tempo ey ta genera e placa ey den forma di bisa. Pero si esey no cana manera mester ta, gobierno lo no genera e suma necesario y lo keda cu un buraco, pues mester busca otro solucion extra pa genera e suma ey. E otro decision cu ta trahando ariba ta pa posiblemente privatisa algun otro departamento di gobierno, y posiblemente haya entrada for di esaki. Pero no a bisa cua departamento ni con y ki tempo, pero si pa 2019. Mucho mas no por a bisa, y a lague den man di minister di finanza pa aclarea. NoticiaCla a tuma contacto cu e mandatario di finanza pero no a haya un reaccion ainda.