Gobierno lo elimina ‘overtolligheidspoel’ na 2019

ORANJESTAD – Gobierno ta bay elimina e asina yama ‘overtolligheidspoel’ comienso di otro aña. Asina prome minister Evelyn Wever Croes a bisa dialuna den e conferencia di prensa bisemanal. E intencion ta pa sinta cu e 40 pa 50 trahado cu ta forma e ‘pool’ aki, y yega na un acuerdo cu nan pa ubica nan un caminda. Si no por yega na un acuerdo, lo duna nan un pakete di retiro y asina deshaci di e ‘poel’ aki. Segun Wever, e 'poel' aki ta costa gobierno 7 miyon florin pa aña, siendo cu e trahadonan no ta produciendo nada. 

KICO E TA 

E overtolligheidspoel ta un grupo di persona cu durante añanan, gobiernonan mes a pone un banda, pa pone nan hendenan den cierto funcion. Como cu pa ley no por kita e personanan sin motibo, a hinca nan den un tipo di grupo, cu di cual mayoria ta na cas cu pago, sin cu nan ta presenta na trabou. Hopi di nan ta ex hefenan di  departamento, cu ta gana basta placa. Tin algun cu tin por lo menos 12 aña ta gana schaal 13 pa 14 sin ta na pia di trabou. E problema ta cu mayoria di nan ta liga politicamente y cu dependiendo e signatura di gobierno, ta wordo hala un banda. Ora cu e gobierno di nan signatura bolbe, algun di nan ta bay bek nan trabou.