Minister Otmar Oduber recuperando satisfactoriamente

ORANJESTAD – Minister Otmar Oduber ta recuperando satisfactoriamente den hospital. Asina minister president Evelyn Wever Croes a bisa dialuna mainta den un conferencia di prensa. Manera ta conoci, den fin di siman (diasabra), e mandatario cu cartera di e.o. medio ambiente y infrastructura, a bira malo durante preparacion pa un actividad di carnival. A transporte cu urgencia cu ambulance pa hospital, segun su famia a confirma pa NoticiaCla diasabra. Esaki a crea un poco panico ya cu ta trata di un mandatario den funcion. Den caso asina, e ta bira noticia. “E tin keintura halto y ta deshidrata” tabata e informacion ricibi. Despues riba facebook a desmenti cu e tabatin sangramento interno. Segun Wever awe mainta, Oduber lo tuma algun dia extra pa recupera completamente. Informacion cu NoticiaCla tin ta cu recientemente Oduber a haci algun tratamento medico, mientras cu algo tempo atras, e tabata malo tambe cu piedra den riñon. No ta conoci si el a recupera di esaki y si e tratamento recien tabata relaciona cu e caso di piedra.