Besaril: ‘Bon Informacion pa haci un escohencia di estudio ta cardinal’

DEN HAAG\ORANJESTAD  – Minister Plenipotenciario Guillfred Besaril a bishita tres scol di educacion secundario na Aruba pa duna informacion na e alumnonan cu ta den voorexamen riba escohencia di estudio y tambe informacion si nan pensa pa scohe pa bai Hulanda pa estudio. E encuentronan aki a tuma lugar na Colegio Arubano San Nicolas, EPI y Colegio Arubano na Playa.

Na tur tres encuentro minister Besaril a enfatisa e importante di ta bon informa pa scohe ki estudio bo ta bai sigi despues cu bo a caba Colegio of EPI. ‘Como minister mi ta convenci cu e hoben mester ta bon informa riba tur opcion cu tin pa sigi un studio avansa. Na momento cu bo tuma e decision pa sigi un tipo di studio, bo mester pensa tambe kico ta mi chens pa haya un trabao si mi kier bin bek Aruba. Den e grupo di studiante cu a bin e aña aki un grupo grandi ta sigi un studio pa International Business. No tin nada malo cu e estudio riba su mes, pero compronde si cu bo lo mester competi cu hopi otro cu tambe tin e diploma ey,’ asina minister Besaril a bisa.

Den su discurso e mandatario a pone hopi enfasis riba sectornan na Aruba cu mester di profesionalnan local. Minister Besaril: ‘Aruba ta ricibi mas cu 1 miyon turista stay over. Nos tin hotelnan grandi cu tur hunto ta produci hopi sushi y te ainda nos no tin ningun Arubano cu a studia of ta interesa pa studia pa “Waste Management”. Aruba ta rondona pa awa y tur loke ta wordo consumi mester wordo impor-ta. Pero ningun di nos hendenan ta studia economia logistico. Asina tin hopi otro sectornan manera salubridad. Den enseñansa di un scarsedad na docentenan pa wiskunde y Nederlands. Gobierno di Aruba kier mira e sector primario crece cu proyectonan innovativo. Tur ta sectornan cu por brinda e hobennan oportunidad grandi na Aruba,’ asina Minister Plenipotenciario Guillfred Besaril a duna di conoce na e alumnonan presenta na e encuentronan.

Tambe Minister Besaril a papia riba e otro aspecto pakico e ta bin ta pone enfasis riba e hecho cu mes-ter por informa nos hobennan mihor. Y esaki ta tin di haber cu e escohencia pa bai studia na Hulanda. E mandatario a bisa cu lastimamente e experencia e aña aki tabata ta, cu hopi hoben a yega Hulanda y nan no tin lugar pa keda; nan no tin un camber. Esaki ta un problema grandi pasobra tin un scarse-dad enorme na camber pa studiante na Hulanda. Y e scarsedad aki ta haci cu e prijs di huur pa un camber, principalmente den e ciudadnan grandi manera Amsterdam, Rotterdam, Den Haag y Utrecht ta hopi halto. E aviso di minister Besaril ta pa e hoben mira si e mesun estudio por wordi sigi na ciu-dadnan mas chikito manera Den Bosch, unda kisas ta mas facil pa haya un camber. ‘Hulanda ta un pais cu un otro cultura, balor y pensamento. Hopi hoben nunca a bai Hulanda y no tin un nocion kico ta spera nan. Kico ta nifica pa ta na ora, pa corre tras di un trein, tram of bus. Y cu e Hulandes ta hopi asertivo; hopi direct y nan ta spera di bo pa bo tuma responsabilidad propio pa tur cos cu bo ta haci,’ segun minister Besaril.

Despues di e discurso di minister Besaril, coordinador di enseñansa di Arubahuis James van der Linde a tene un presentacion riba “Studeren in Nederland”. Den e presentacion aki James a pasa riba tur punto cu e hoben lo mester tene cuenta cune na e momento cu e ta bai studia na Hulanda; di finan-ciamento pa estudio te cu e weer na Hulanda. Un punto importante di e informacon aki tabata e fa-cilidad cu Hulanda tin pa yuda bo haci un escohencia di un studio, den e caso aki e website Stuiekeuze123. E website aki di e ministerio di Enseñansa di Hulanda na un manera hopi cla y den fasenan cu ta yuda bo haci un escohencia: mira ki tipo di estudio ta pas cu bo y na unda tur na Hu-landa bo por sigi e estudio aki.

Na tur tres encuentro tabata tin hopi interes di e alumnonan y hopi di nan a haci uso di e oportu-nidad pa haci pregunta. Esaki a mustra cu e vision di Minister Plenipotenciario Guillfred Besaril a sirbi su proposito pa informa y prepara nos hobennan pa un estudio na Hulanda. Nota pa redacion: E potretnan ta cortesia di Cas di Aruba