Crossing for Hope a uni Aruba den un forma sinigual!

SAVANETA – Aunke no hunto, pero tur 5 landado di Aruba cu a participa den e hazaña ‘Crossing for Hope’, esta e landa di Venezuela pa Aruba, a yega Aruba diadomingo atardi, sano y salvo. E prome cu a yega, tabata Davy Bisslik cu a yega na e lugar programa esta Zeerovers, den careda di 3’or di atardi. Algo despues, poco mas pabou, debi na e coriente, Stefan Thijsen a yega na Bacardera. Esun pa sigui, tabata Romar Arends cu a yega un poco mas pabou, tambe na Barcadera. A sigui Deaxo  Croes y Gwendeline Kock cu tambe a yega, aunke tambe no na e lugar planea debi na e coriente. Sinembargo, tur a logra marca historia un biaha mas, despues cu Roly Bisslik a haci esaki 30 aña pasa. NoticiaCla a percura pa un cobertura total henter dia, cu imagen livestream y potretnan continuo. 

E EVENTO

E 5 landadornan a sali pareu, diadomingo mainta trempan for di Venezuela, pero coriente a pone cu cada uno a haya nan mes riba nan propio trayecto, cu a pone cu nan no a logra drenta hunto. Davy Bisslik a coy un rumbo casi ful pariba, cu a salie bon, ora cu coriente mes a hibe mas cerca posibel di su destino esta Zeerovers. Asina mes e mester a landa ‘bek’ un pida pa yega na su sitio. E publico na Zeerovers y besindario tabata inmenso y tabata parse cu mitar Aruba tabata ubica na un solo sitio. Unabez cu Davy a yega, cos no a caba y e botonan cu tabata acompaña e landadornan, a sigui mesora pa e otro 4 nan. Cada un a haya nan mes ta tuma decisionan rapido pa wak unda nan por a yega tera mas liher posibel. Y asina cada uno a yega un otro lugar, pero importante tabata cu nan tur a yega. 

COOPERACION Y UNION

Loke a resalta henter dia, tabata e union incredible riba laman, unda cu tur boto tabata coopera, sigui otro y tabata pendiente constantemente di otro. E hermandad acuatico ta loke mas a resalta. Unabez cu Davy a caba, esaki tabata mas bisto. Enbez di laga cos te ‘ey’, mesora tur boto a ranca sali rumbo pa e siguiente, cu tabata Stefan, sigui pa Romar, Deaxo y Wendy. Y cada uno a keda ricibi cu e mesun entusiasmo, manera cu nan tur tabata e ganador riba nan mes. 

LOGRO

Esun cu a logra diadomingo, tabata Aruba y specificamente Wilhelmina KankerFonds. E meta principal tabata pa recauda fondo pa e instancia aki, y ta mustra cu nan lo logra nan meta sigur. Pa loke ta e landadornan, nan a logra uni Aruba un biaha mas pa un meta, y tur otro problema tabata pa pasado pa por lo menos un dia. Mientras cu ta 5 landado a haci e sacrificio, e logro ta mas grandi cu esey.  Un Aruba uni, pa un solo meta, pa medio di un evento deportivo sano y bunita. Y cu ne, esun cu porta mas a goza, ta esun cu a cuminsa tur cos 30 aña pasa, Roly Bisslik. Mira su yiu drenta na e sitio programa, prome, mester tabata un orguyo personal inmenso pa e ‘dolfin humano’, e apodo cu Bisslik a haya 30 aña pasa. NoticiaCla ta felicita tur e 5 landadornan, nan famianan, nan team y e organisacion cu riba su mes a haci algo grandi pa Aruba. Pabien! Potretnan riba laman ta di NoticiaCla, y esnan riba tera ta cortesia di 297 Sports.