E landadornan di 'Crossing for Hope' cla pa landa for di Venezuela

PUERTO ESCONDIDO – E cinco landadonan di Aruba cu ta participa den e evento 'Crossing for Hope', y henter e crew a yega Venezuela bon diabierna. Asina e portal deportivo di Aruba 297 Sports ta raporta. Awe ta dia di descansa mientras mañan mainta entre 6.30 a 7or di mainta nan lo sali for di Puerto Escondido rumbo Aruba. Manera ta conoci, e landadornan, Deaxo Croes, Davy Bisslik, Romar Arendsz, Stephan Thijsen y Gwendolin Kock lo purba iguala e hazaña di Roly Bisslik di 30 aña pasa, esta di landa di Venezuela pa Aruba. Nan a entrena y prepara pa mas di un aña y ta cla pa e hazaña aki. Diabierna merdia 12’or nan a sali rumbo pa Venezuela pa asina haci nan ultimo preparativonan prome cu nan sali bek pa Aruba diadomingo. Meta di e evento ta pa recauda fondo pa Wilhelmina Kanker Fonds. 

ACOMPAÑO 

For di Aruba tin varios yate y botonan mas chikito cu lo topa cu e landadornan y e ‘delegacion’ mitar caminda y bolbe cu nan pa Aruba. Ta premira cu e landadornan por yega Aruba den careda di 3 pa 5 or di atardi diadomingo. Y e intencion ta pa nan yega bek na e area di Zeerovers. Caya ta wordo cera eybanda, y pa prensa tin un area special cu por cubri e yega. 

NOTICIACLA

NoticiaCla lo ta riba laman y na tera despues cubriendo e evento aki tambe diadomingo. Pues keda pendiente cu e cobertura aki cu lo cuminsa for di mainta tempran, y sigui durante curso di dia, sea via livestreaming y of cu potret y otro video. 

Potret  cortesia 297 Sports.com