Periodista deteni a drenta welga di hamber como protesta

ORANJESTAD – Periodista deteni Nelson A. lo a drenta un welga di hamber. Asina abogado di A. Chris Lejuez a confirma pa NoticiaCla. Según Lejuez, A. a dicidi di tuma e accion aki for di diamars caba como protesta cu nan tin’e deteni sin cu tin motibo. El a bisa na varios ocasión según informacion ricibi, cu e no a paga ningun polis pa informacion, e no a horta ningun radio di polis y no a haya ningun radio na su cas tampoco. A. ta deteni for di diamars mainta, y despues di su prome interogacion (el a opta pa usa su derecho di keda keto y a bisa masha poco mes), a pone den ‘verzekering’, cu  ta básicamente prolongación di su detencion pa 2 dia. Diahuebs awor huez comisario tin cu dicidi si ta prolonga e detencion of ta dune su libertad.