Bikker: Detencion di periodistanan no tin di haber cu libertad di expresion

ORANJESTAD -  E asunto di detencion di varios periodista, no tin nada di haber cu libertad di expresion ni e trabou di periodismo. Asina minister di husticia Andin Bikker a bisa diaranson mainta durante un conferencia di prensa. Mescos cu Procurador General Alexander van Dam algun rato prome den su propio conferencia di prensa, Bikker kier a clarifica y sigura cu e loke ta sosodiendo no ta nan influencia a pone esaki cuminsa cana. E mandatario ta lamenta cu hendenan cu mester sa miho y ta studia den ley ta riska tilda e mandatario actual y e PG di metemento politico den e aparato hudicial. Segun e mandatario, ora cu e opositornan haci e declaracionan haci, no ta tildando e mandatario actual, sino e institutonan cu no tin cara ni fam. Bikker a mustra cu ex minister Dowers tabata na mando 8 aña y mester sa precies con e situacion ta.

CARTA PA INSTANCIANAN INTERNACIONAL

E mandatario a bisa tambe cu a compronde cu ministerio publico lo manda un carta pa e instancianan internacional manera IAPA y SIP cu ta na defensa di periodistanan rond di mundo. A compronde cu donjo di trabou di e periodistanan deteni na Aruba, a bati alarma na tanto SIP como IAPA, kehando e situacion di gobierno actual. Y mesora e dos instancianan aki a tuma e palabra y a reacciona contra gobierno. Bikker a mustra cu e ta lamenta esaki ya cu a haci esaki sin busca e otro banda di medaya. Awor lo mustra e dos instancianan aki kico en realidad e situacion ta y cu no ta trata di stroba periodistanan di haci nan trabou, evitando asina cu Aruba ta haya un mancha scur pa loke ta trata e tema aki.