PG: ‘No tin metemento politico cerca mi of mi fiscalnan!”

ORANJESTAD –‘No tin metemento politico cerca mi of mi fiscalnan!. Esaki tabata e mensahe principal di Procurador General Alex van Dam diaranson mainta den un conferencia di prensa. “Mi no por y no ta lagami wordo controla door di ningun hende  cu por bisami kico mi por y no por haci. Esey ta conta pa awor y semper tambe” van Dam a sigura un y tur presente.  E motibo principal pues di su declaracion tabata pa kita tur posibel duda cu por existi cu tabatin metemento politico den e asunto actual di periodistanan deteni y cualkier otro caso den pasado. E declaracion ta bin a rais di declaracionan politico di oposicion cu a indica cu tin metemento politico den ministerio publico y cu kier silencia cierto miembronan di prensa cu tabata deteni y esnan cu ainda ta sigui deteni.  Van Dam a mustra cu e ta hopi serio den e asunto aki. “ Mi kier subraya cu. ministerio publico ta traha independiente. No tin cuestion di metemento politico cerca sea ami of mi fiscalnan” van Dam a sigui bisa. Van Dam a admiti cu e departamento ta ‘gehurt’ pa e acusacionan cu ta bin den nan direccion y pesey a opta pa tene e conferencia aki den e forma ey, envez di djies un comunicado.

E CASO MES

Riba e caso mes van Dam no kier a bay den detalles pasobra e ta un caso den pleno investigacion y no por duna detalles di e caso. Ni maske cuanto prensa a haci pregunta riba e caso, van Dam no kier a haci nada. Loke si van Dam a subraya un biaha mas ta cu e periodista deteni y esnan cu tabata deteni, no ta(bata) deteni pa motibo di a eherce nan trabou como periodista of pasobra nan ta periodista, sino pasobra ta sospecha cu nan ta involucra den robo di radio di polis.