E di tres periodista sospechoso den caso di radio di polis ta den libertad

ORANJESTAD – E di tres periodista sospechoso den caso di radio di polis  cu a wordo deteni siman pasa relaciona cu un investigacion di ladronicia, desfalco y/of heling di un of mas radio di polis di Cuerpo Policial di Aruba, a wordo poni den libertad. Su detencion no tabata necesario mas pa e investigacion. Ta trata di e periodista Marko Espinoza. Vocero di ministerio publico Ann Angela a confirma esey pa NoticiaCla diamars anochi. Na cuminzamento di e siman aki dos otro sospechoso a wordo poni den libertad. Tur tres ta keda sospechoso den e investigacion. 

E dos personanan cu a wordo deteni awemainta dor di Landsrecherche, ta keda den detencion. Nan ta wordo sospecha di ladronicia, desfalco y/of heling di radio di polis.  Cu asombro Ministerio Publico a tuma nota awe atrobe di cierto noticianan rond di e caso aki. Como instituto independiente Ministerio Publico no ta laga niun hende dune instruccion. Ministerio Publico no ta haci politica y lo nunca no start un persecucion pa motibonan politico. E investigacion den e caso di radio di polis ta continua.