BCA cu di tres conferencia riba innovacion

ORANJESTAD - Den un sala di Hyatt Regency Aruba Resort & Casino yena cu ehecutivonan di sector publico y sector priva, Banco Central di Aruba (BCA), a organisa diabierna ultimo e tercer evento den cuadro di innovacion, cu e topico e biaha aki centraliza rond di “Digital Transformation & the Future of Governance”. 

Den añanan anterior BCA a enfoca mas bien riba tecnologianan den sector priva, por ehemplo, tecnologianan financiero, pero e aña aki a scohe pa cambia e enfoke riba transformacion di e sector publico y alabes pa acentua con pa uza tecnologianan efectivamente pa logra e cambionan necesario den institucionnan y comunidad en general. 

Presidente di BCA, Jane Semeleer, a habri e conferencia: “Innovacion, institutonan y integridad kiermen poco si no ta involucra nos cuidadonan. E futuro di gobernacion ta uno inclusivo, unda nos ta deshaci di e structuranan y maneranan di pensa antiguo y yama bon bini na tecnologianan y ideanan nobo cu respet y dignidad. No por construi un isla innovativo sin desaroya un isla integro”, tabata e mensahe claro di señora Semeleer. 

Como e prome orador di e evento Prome Minister Evelyn Wever-Croes a enfoca riba e vision di gobierno: “Ta nos vision pa tin un gobernacion unda nos ta pone e ser humano central door di haci uzo di tecnologia na un manera efectivo. Asina nos por ofrece nos servicionan publico mas facil y eficiente ”, ta comenta nos Prome Minister Wever-Croes.  

Cu oradornan internacional y nacional, esta Jane Treadwell, Digital Development Manager di The World Bank, Andres Kutt, Chief Technology Officer pa Gobierno di Estonia, y yiu di tera Dustin Ling, Director Global Public Sector Banking di Citibank, y un Q&A coordina door di Jemi Lacle di the World Bank Group e programa tabata yen.  

BCA kier a gradici tur participante di e evento, y ta sigui cu e conferencianan aki pa promove dialogo entre e diferente stakeholdernan tocante innovacion, tecnologia y tranformacion digital.