Edificio di DIMAS ta habri bek diaranson awor

ORANJESTAD – Contrario na e trahadonan di DAO (dept di labor), esnan di DIMAS, no mester muda of traha for di cas. Esaki segun directora di DIMAS, Kathy Paskel a sigura NoticiaCla.com. “Mi por informabo cu DIMAS lo no muda, considerando e resultadonan y conseho ricibi” Ruiz-Paskel a bisa NoticiaCla.com. Minister di labor, Paul Croes a bisa NoticiaCla.com sinembargo cu e trahadonan di DAO, si lo muda pa otro lugarnan y algun lo traha te hasta for di nan cas.

Mientrastanto DIMAS a avisa cu nan tin cambio atrobe pa cu e situacion di cita di permiso. E oficina mes ta habri bek diaranson mainta 8:30am. Tur cliente cu tin cita confirma pa entrega un peticion di permiso di estadia temporario na DIMAS tentativamente ta hala pa otro siman y ta keda notifica lo siguiente – pa motibonan ariba menciona.Tur cita di dia 13, 14, 20 y 21di October ta hala pa diabierna dia 24 di October 2014 na e mesun orario.Tur cita di dia 15 di October ta hala pa diaranson dia 22 di October 2014 na e mesun orario.Tur cita di dia 16 di October ta hala pa diahuebs dia 23 di October 2014 na e mesun orario.Tur cita di dia 17 y 24 di October ta hala pa diabierna 31 di October 2014 na e mesun orario.DIMAS ta pidi tur su clientenan pa tin comprension pa e situacion aki. Tene bon cuenta cu e cambionan aki riba menciona. DIMAS ta pidi alavez su disculpa pa cualkier inconveniencia cu esaki lo por trece cu ne.

Tabata diahuebs ultimo cu espues di investigacion den edificio di DAO y DIMAS, NoticiaCla.com a haya confirmacion di minister Croes (labor) cu desicion a cay cu e edificio completo no ta apto, y cu lo muda varios departamento for di e edificio actual. . Algun di e trahadonan di DAO (Labor) lo a wordo acomoda na edificio di mediador di gobierno, mientras cu algun lo bai na 5o piso unda cu si no tin problema segun Croes. Tambe algun trahado lo sigui traha for di cas, continuando cu nan investigacion.

Un dia prome, NoticiaCla.com a tende caba cu mientras cu ta soluciona e problema di holo malo y otro asuntonan higienico, trahadonan di departamento di Labor (DAO)  y di DIMAS lo keda cas. Esaki ta e decision cu minister di labor Paul Croes a sigura NoticiaCla.com diaranson mainta. No ta descarta cu ta buscando un edificio temporal pa ubica e trahadonan (57 total), pendiente e trabounan cu lo tin cu haci pa drecha e situacion structuralmente. Fuera di DAO, tin tambe e trahadonan di DIMAS, cu tambe a bay den accion diaranson mainta. Hunto, ta papia di un total di 140 trahado entre DIMAS y DAO. No ta conoci si pa e trahadonan aki tambe e regla ey lo conta, pero segun Croes, e ta sigur cu su colega minister di DIMAS Benny Sevinger, lo por haci mescos.

Mes momento e mandatario a mustra su disgusto pa e hecho cu e director di Labor no a sigui e orden di e mandatario. “Mi a bise e director cu mientras cu no tin claridad riba un solucion pa e holo desagradabel, no pone ningun hende na trabou” Croes a bisa. E director sinembargo, no a cumpli cu e orden aki. “Mi ta lamenta cu e trahadonan a wordo poni toch na trabou, siendo cu e instruccion tabata hopi duidelijk pa labor cu no por pone trahadonan den un ambiente cu no ta bon pa nan salud” e la sigui bisa. E no kier a bisa si cu e director a desobedece un orden, pero a bisa si cu e la mustra su descontento. Segun Croes, trahadonan por haci cierto trabounan for di nan cas, pa toch presta servicio, pero mientras cu e lugar no ta apto, nan lo keda cas. “Nos a duna e director orden awor atrobe pa mientras cu no tin solucion pa e problema, no ta laga ningun hende traha”.

Mientrastanto un representante di e trahadonan, Maria Koolman a comparti su disgusto na NoticiaCla.com diaranson mainta. Segun Koolman, e situacion di e edificio ta problematico. Un problema di holo tabata esun inicial, pero e la empeora. For di tempo cu nan a drenta den e edificio nobo, nan a confronta problema. “Loke ta concerni nos, ta cu e testnan haci ta tardando masha hopi mes y nos no por warda mas” Koolman a sigui bisa. E la mustra NoticiaCla.com marca na su curpa cu ta indica supuesto simptoma di rash. E problemanan segun Koolman, ta bay mas lew cu holo. "Tin problema di pieuw, carpata y raton tambe. No papia mes di e palomanan morto cu ta haya riba dak".  E potret di archivo ta momento di e 'walkout' cu e trahadonan di tanto DAO como DIMAS a tene diaranson ultimo ora cu nan a bolbe trabou, pa tende cu ainda no tin un solucion pa e problema di holo malo.