Oduber: Lo acerca Bogaerts pa yuda inverti den deporte di Aruba

ORANJESTAD - Gobierno di Aruba lo acerca e pelotero profesional di Aruba Xander Bogaerts, pa yuda inverti den deporte di Aruba y fungi como un 'role model'. Asina minister di deporte Dangui Oduber a bisa NoticiaCla dialuna, contestando asina un pregunta di e portal riba e tema. Tin un tereno cu ta adopta pa Bogaerts na Lago Heights, pero cu actualmente no ta den bon condicion. A compronde cu esaki lo ta pa motibo di e problema cu Lotto, segun e minister. 

OTRO PELOTERONAN

Peloteronan profesional internacional manera Kenley Jansen, Jurickson Profar y Andruw Jones, tur ta ganando miyones di dollar pa aña y ta duna bek na e.o. nan isla natal Corsou. Den e cuadro aki, Oduber kier acerca e pelotero (cu tambe ta gana miyones pa aña) pa wak con nan por traha hunto pa bienestar di deporte. No a tene ningun combersacion concreto y oficial riba e tema, pero si a toke den un forma inoficial. Den pasado y actualidad, manera indica caba, peloteronan manera Jurickson Profar, Andruw Jones y mas actual awor Kenley Jansen a inverti sumanan cuantioso bek den deporte di Corsou, sea den forma di paga pa balanan di baseball, upgrading di tereno di baseball, y den caso di Jones, renobacion di e parke di little league al estilo 'Williamsport', invertiendo un suma di 5 miyon florin. A compronde cu a pone un scoreboard completamente nobo den stadion di Rif. E peloteronan aki ta gana miyones di dollar y ta haciendo esaki bek pa Corsou. Como tal kier check cu Bogaerts, pa e tambe haci mescos y asina yuda Aruba su deporte. E mandatario a mustra cu Lotto ta strobando desaroyo di inverti y como tal lo ta bon pa esaki por tuma lugar. 

 e