Relieve di Vale Croes desvela diadomingo

ORANJESTAD - Diadomingo anochi minister di Cultura  Xiomara Ruiz-Maduro a efectua e desvelo di e relieve di Rudolfo Valentino 'Vale' Croes den presencia di su sra Lourdes, yuinan, nietonan, demas famia y amistadnan. Tabata un anochi bunita yena cu canto, chiste, actuacion y musica, locual cu Vale tabata gusta caminda a duna honor na nos baluarte cultural humoristico di Aruba, Antias y Hulanda. Vale ta conoci pa mas cu tres decada haciendo presentacionnan humoristico conoci como “ Show di Vale”. Vale ta conoci e arubiano original, e comico, actor, cantante y carpinte fini. E relieve ta obra di nos artista local sra Maritza Erasmus y por wordo admira na e amphiteatro Edgar Connor na Paseo Herencia.