Tres polis mas suspendi y prohibi pa drenta wardanan di polis

ORANJESTAD – Tres polis mas a wordo prohibi pa drenta tur warda d polis. Cuerpo policial diabierna a bisa cu den cuadro cu un investigacion interno awe, e agentenan policial di inicial G.A.D. , E.S.M. y F.V.W. a wordo prohibi pa drenta tur wardanan di polis.

“Mas informacion nos no tin tocante e caso” vocero di polis Lito Lacle a bisa prensa. Cu e tres polisnan aki, e total di polis suspendi ta yega na 5. Uno a keda suspendi dia 25 di October, esta P.A.K.G, y dia 30 di October K.G.R. E ultimo aki ta relaciona cu e caso di e detencion di e tres periodistanan pa motibo di sospechoso di robo di radio/portafoon di polis.