Detencion di tres periodistanan prolonga cu 8 dia mas

ORANJESTAD - Huez comisario a dicidi pa prolonga e detencion di e tres sospechosonan, e peridostanan Marko E., Maritza L. y Rossi T. Asina vocero di ministerio publico Ann Angela a confirma diabierna atardi. Segun Angela, e investigacion ta continua y nan detencion ta sigui necesario na e stadium aki.

DETENCION 

E tres periodistanan cu a keda deteni dia 30 di October marduga pa asunto di radio di polis/portofoon, a wordo traslada pa un cel di warda di polis e mesun atardi. Vocero di ministerio publico Ann Angela a confirma cu nan a wordo poni ‘in verzekering’ e dia ey, cu ta proceso cu ta sigui despues cu autoridad interoga nan. E proceso ta cu despues di detencion, ta interoga e sospechosonan pa despues si ta necesario, pone nan ‘den verzekering’ pa un periodo maximo di 2 dia. Si ta necesario pa nan keda mas largo cera, por prolonga esaki cu 3 biaha 8 dia, sigui pa 60 dia. Como tal e prome parti di 8 dia ta drenta na vigor awor. 

E CASO

Manera NoticiaCla a raporta anteriormente   Landsrecherche a detene e tres periodistanan aki  relaciona cu un investigacion di ladronicia, desfalco y/of heling di radio di polis di Cuerpo Policial di Aruba. Den e investigacion a haci tambe cinco huiszoeking, caminda a confisca entre otro, un radio di polis (portofoon). 

SOSPECHOSO

Ministerio Publico a confirma cu e tres personanan deteni ta traha como periodista y cu nan ta wordo sospecha di a haci nan mes culpable di ladronicia of heling di un of mas portofoon di KPA. Un di e huiszoekingnan a wordo haci den cas di un trahador di KPA.

INVESTIGACION

Landsrecherche a cuminza e investigacion entre otro, riba sospecho cu un of mas periodista lo ta den posesion di un radio di polis. E sospecho aki ta atacha integridad di Cuerpo Policial di Aruba. Ademas ta considera inacceptable cu personanan cu no ta autoriza por haya conocimento di comunicacion confidencial policial via portofoonnan. Esey ta daña investigacionnan penal y ta viola privacidad di esnan envolvi. E investigacion ta continua.