Romero: San Nicolas Port Authority lo bira un realidad na 2019

ORANJESTAD - San Nicolas Port Authority lo bira un realidad na 2019. Asina minister di Transporte Chris Romero a bisa e siman aki durante un conferencia di prensa.  Según e mandatario, for di cuminsamento di e proyecto Fast Ferry, el a indica cu esaki mester wordo desaroya na San Nicolas. E titular di Transporte  ta insisti y haci tur lo posibel pa incentiva mas inversion na San Nicolas. Recientemente, conhuntamente cu Minister di Turismo a hiba representantenan di un liña crusero grandi pa wak e area P’ariba di Brug.

Pa e desaroyo grandi na caminda pa San Nicolas, Minister Romero a propone pa articula un organo di autoridad. E organo aki, cu lo carga e nomber di San Nicolas Port Authority, lo tin tur autoridad pa construi, maneha, mantene y desaroya waf y/of tereno den e area P’ariba di Brug Pa duna un ehempel concreto, construccion di e facilidad pa e Fast Ferry na San Nicolas lo ta na encargo di San Nicolas Port Authority.

Recientemente, Minister Romero a ricibi sosten uniname for di Conseho di Minister pa cu su iniciativa di articula e San Nicolas Port Authority. Awor San Nicolas Port Authority ta bay wordo articula pa medio di un ordenansa nacional. E concepto di ley lo cana su caminda legal pa wordo trata finalmente den Parlamento di Aruba.

Despues di a haya aprobacion di Conseho di Minister, awor e concepto di ley ta bay Departamento Huridico pa wordo prepara cu su asina yama ‘memorie van toelichting’. Na final Minister Romero a expresa su gratitud pa aceptacion di su iniciativa y ta spera cu na cuminsamento di aña 2019, San Nicolas Port Authority por bira un realidad.