Ley di ortografia di papiamento a pasa unanimamente den Parlamento

ORANJESTAD – Parlamento a pasa Ley di Ortografia di parlamento unanimente diahuebs atardi (20-0). Parlamentario Sue Ann Ras (MEP) cu a carga e ley aki, cu e acto aki,  a comenta cu e historia den conseho insular na 1976, a ripiti. “E emocionnan tabata halto, pero loke a prevalece tabata e disposicion, importancia y union pa Papiamento haya su status y su ley di ortografía” Ras a bisa NoticiaCla. Y según Ras, tur parlamentario a indica esaki den nan disertacion. Na final Parlamentario Ras a entrega un mocion, unda cu urgi Gobierno pa instala un Instituto di Idioma, introduci un diccionario splicativo y bin cu curso pa corector y traductor. Tambe a entrega un amienda den nomber di ful Parlamento, pa referi e ley: Landsverordening schrijfwijze Papiamento, como Ordenansa Nacional Ortografia di Papiamento. 

LEY ORTOGRAFIA 2018

For di mainta a inicia e reunion y mester remarca cu casi tur Parlamentario a hiba palabra. Den liña grandi, tur cu a papia, a indica cu Papiamento ta importante y cu nos mester haci mas pa logra dun’e su status, balor y respet nacional y constitucional. Trahando den sector di enseñansa pa 15 aña, bo ta experiencia hopi frustracion, dolor y disgusto con nos sistema di enseñansa ta stroba nos mucha- y hobennan saca nan potencial y disfruta di un enseñansa husto y di calidad. 

HIPOCRECIA CU NOS IDIOMA PAPIAMENTO

“Nos ta anda cu poco hipocrecia cu nos idioma Papiamento. Y mas cu claro mi kier splica esaki miho. Na Aruba nos ta elogia, aprecia, respeta y balora Papiamento, specialmente riba Dia di 18 di Maart. Pero tambe nos por scucha awendia, con nos hendenan ta grita den tur 4 skina di Aruba: “papia Papiamento y respeta nos idioma y cultura, sino bay bek bo pais.” Sinembargo e mesun amor y respet cu nos ta exigi di otro, ora e ta toca na nos, pa defende y para pa nos idioma como e instrumento principal pa drenta enseñansa, unda e lo crece, desaroya y fortalece nos habilidadnan critico di pensamento y formacion personal, nos ta bira lomba p’e y ta pensa cu nos idioma ta inferior”, Ras a indica den su disertacion. Mito di esaki tin varios: unda bo ta bay cu Papiamento, Papiamento no ta un idioma, Ta Hulandes nos muchanan mester siña… y asina tin un cuantioso ehempel di con nos mes ta discrimina y desbalota e balor y importancia di nos idioma materno, cu ta cientificamente comproba y sosteni pa UNESCO: desaroya bo idioma materno y ta hacie mas facil pa yega na transicion adkisicion di cualkier otro idioma, incluso Hulandes. “Ta un derecho fundamental cu nos tin y nos ta bayendo contra tur ciencia y investigacion, djis pa miedo y duda di nos propio identidad di nos lenga materno y su balor cientifico den desaroyo total di un persona. Un muestra palpabel di mente colonisa!!!”, segun Ras. 

PAPIAMENTO SU CARA A GLORIA

“Cu nos tin hopi reto nos dilanti, no tin duda! Pero awe mester ta un dia glorioso y di celebra y mi kier finalisa expresando mi gratitud na tur e miembronan di e comisionnan cuminsando for di aña 1976 te cu awo na 2018, cu a lucha incansablemente pa hunto nos logra Ley di Ortografia Papiamento”, Ras a expresa cu hopi emocion. Tabata un bunita experiencia pa tin e baluartenan y e luchadornan incansabel den sala, ya cu pa hopi aña, nan a bringa y duna empuhe na nos idioma, p’e haya reconocemento den e organo di mas halto y den nos comunidad. “Un palabra di gradicimento y na tur e fraccionnan cu den transcurso di aña, a mira toch e importancia pa uni y duna Papiamento su luga y na nos pueblo cu awe, porfin por mira un trayectoria largo di nos idioma den e proceso di realisacion como idioma oficial di Aruba, cu ta e pais cu tanto ami y boso ta stima y Papiamento ta e idioma cu ami y boso ta uza den Sala di Parlamento pa debati, discuti y expresa”, Ras a finalisa bisando.