Joran vd Sloot acusa di estafa di placa di casino na Peru

LIMA – Conocido Arubiano Joran van der Sloot cu ta cera den un prison na Peru pa asesinato di e dama Peruano Stephany Flores na 2010, atrobe ta den noticia. Prensa Hulandes ta referi na e caso di labamento di placa precedente di casino online. Tin sospecho segun autoridad Peruano cu vd Sloot y su pareha Leidy lo a estafa 350 mil euro.  Algun casino online segun autoridad Peruano, a haci denuncia di estafa, despues di cual e investigacion a cuminsa. E casinonan lo a perde placa door di hungamento falso di weganan di casino y manipulacion. Parti di e placa perdi, a aparece riba cuenta bancario di e casa di vd Sloot. Tambe tin mencion di un otro Hulandes. 

CONFIRMACION

Abogado di vd Sloot, Maximo Altez lo a confirma e  sospecho riba su cliente pero no kier a duna mas comentario segun e portal Algemeen Dagblad. No ta conoci si e lo defende vd Sloot den e caso aki. Tin indicacion cu e casa di vd Sloot por keda deteni riba e cargo aki tambe. Loke ta hala atencion ta cu e casa di vd Sloot ta bin di un barrio pober, pero aworaki ta bibando den un apartamento luhoso den un area costoso di Lima. Como tal autoridad Peruano kier embargo cas y auto y mas propiedad di e casa. Vd Sloot ta sintando un castigo di 28 aña pa morto di Flores, di cual el a sinta 8 caba. Segun regla di Peru, si e prisonero tin conducta positivo, por reduci e resto di sentencia cu mitar. Pero no ta kere cu esaki lo ta e caso awor.