Elmar: Dos dia di storing a afecta coriente den San Nicolas y vecindario

ORANJESTAD – Dos dia sigui, problema cu coriente a afecta San Nicolas y besindario. E compania di utilidad NV Elmar a splica diahuebs e motibo riba e causa aki. Pa cuminsa,diamars 30 oktober ultimo a surgi un corto circuito den un kabel mayor di 12000 Volt den nos red di distribucion cu a causa un interupcion den e suministro di coriente pa un gran parti di San Nicolas. Despues di haci cambionan necesario door di pasa load riba otro kabel e situacion a normalisa.

Riba diaranson 31 oktober anochi, alrededor di 9:30, a bolbe surgi un storing den un otro kabel, cual a  causa cu gran parti di San Nicolas a bolbe keda sin suministro di coriente. Despues di identifica y isola e parti di e kabel unda e storing a surgi, a cuminsa reestablece suministro di coriente na e partinan afecta. Pa mas o menos 11:30 di anochi tur cliente a haña coriente bek.

Actualmente N.V. ELMAR ta den proceso di upgrade e systema di proteccion di nos red di coriente como parti di e projecto “Intelligent Load-Shedding”. Pa por haci esaki mester a saca un parti di e substacion San Nicolas for di servicio y pasa load over riba otro kabelnan. E trabao nan aki lo keda cla 15 di november 2018.

Por sucede cu ora pone extra load riba un kabel subteraneo, e kabel por faya. E motibo por ta dañocu a wordo haci na e kabel den pasado, cu no por wordo identifica te ora pone extra load riba e kabel y esaki por causa un storing. Door cu tin diferente proteccion riba e kabel, ora surgi un storing esaki ta interumpi e suministro di coriente den un area hopi grandi. E proteccion riba e kabel ta pa evita mas daño na e red di coriente. Gerencia di N.V. ELMAR a lamenta profundamente cualkier inconvenencia cu e interupcion di coriente por a causa na nos clientenan.