Caso contra ex minister Paul Croes ta keda trata januari 2019

ORANJESTAD – Despues di casi un aña y 10 luna cu polis a tene un entrada hudicial na cas di ex minister Paul Croes, cu a conduci despues pa su detencion (hunto cu mas sospechoso), e ex mandatario lo haya su dia(nan) den corte. Vocero di ministerio publico Ann Angela a confirma diahuebs mainta cu e fechanan pa trata e caso penal conoci oficialmente como e caso Ibis, ta conoci. Ta trata di fecha’nan’ pasobra e ta un caso hopi grandi cu no menos cu 24 sospechoso, entre nan e ex mandatario. E fechanan reserva di 14 pa 31 di januari 2019, durante cual lo tin varios faceta di tratamento. Pa Februari 2019 lo mester tin claridad riba e culpabilidad di entre otro e ex mandatario. 

FECHANAN

E periodo di casi dos siman ta debi na e embergadura di e caso, unda cu tin cu trata no menos cu 24 sospechoso. Riba e comienso di e caso, esta 14 di januari 2019, lo cuminsa trata e hechonan y circumstancia cu lo dura te 17 di januari. Fiscal lo presenta su demanda di 18 pa 21 di januari, sigui pa e defensa cu lo bin na turno entre 22 y 28 di januari (22, 24 y 28). E parti di repliek y dupliek (contestanan y pregunta) lo sigui dia 29 y 31. Y ta premira cu pa fin di februari 2019, huez dicta un sentencia. 

ENTRADA HUDICIAL

Tur cos a cuminsa dia 28 di maart 2017 ora cu autoridad hudicial a tene un entrada hudicial na cas di e ex mandatario. Mientras cu no a pasa pa su detencion e dia ey, oficialmente ministerio publico a informa cu e awor ex mandatario a bira un sospechoso  di corupcion y malversacion di fondo. Fiscal mayor Erick Olthof e tempo ey a specifica cu e awor ex mandatario ta wordo sospecha di a acepta regalo, promesa y of servicio relaciona cu e mercado laboral, conduciendo na e hecho cu stranheronan por a haya permiso di trabou. Hunto cu ne tabatin un lista di persona mas cu tambe a haya e ‘label’ di sospechoso. 

DETENCION

Ta despues di 5 luna cu autoridad hudicial a tuma e paso cu hopi a spera, esta detencion di e awor ex mandatario Paul Croes.  Cu e detencion, a presenta e cargonan pa cual e awor ex mandatario a keda deteni. E seis cargonan contra Croes ta entre otro, “ambtsmisbruik conhuntamente cu otro of otronan den e periodo di 20 di april 2015 te 30 di januari 2017, malversacion conhuntamente cu otro of otronan di placa di e fundacion S.L.&E. den e periodo di 18 di december 2014 pa 28 di maart 2017, labamento di placa (gewoonte witwassen) conhuntamente cu otro of otronan den e periodo di prome di januari 2014 pa 28 di maart 2017, empleo di un persona indocumenta conhuntamente cu otro of otronan den e periodo di 20 di december 2016 te 28 di maart 2017. Pone un persona den ocasion pa e viola LTU den e periodo aki. Mas subsidiario, laga un persona indocumenta traha, participacion na un organizacion criminal den e periodo di prome di januari 2014 te 28 di maart 2017.

PROCESO

E awor ex mandatario despues di 3 luna deteni, a recobra su libertad dia 14 di November 2017, pendiente tratamento di su caso. A sigui un silencio casi hermetico di banda di e awor ex mandatario. Pero 6 luna despues, hopi informacion a bin dilanti. Esaki ora cu dia 23 di mei di e aña aki, e awor ex mandatario y su casa a aparece dilanti mesa berde den un asina yama regie zitting. Durante e proceso aki a stipula kico tur a tuma lugar y kico mas falta. Mientras cu regiezitting ta algo basico y sin mucho detaye, e interes pa esun aki tabata sumamente grandi, mirando cu ta prome biaha cu lo a mira e awor ex mandatario publicamente declara algo posiblemente. Y el a declara tambe, tanto den corte como pafor di corte. Aki el a insisti riba su inocencia y tabata mira dilanti pa e caso bin dilanti. E fecha awor, ta conoci. Despues di 8 luna di e regiezitting, e awor ex mandatario lo presenta dilanti mesa berde pa haya sa su destino finalmente di un caso cu tin mas di 2 aña andando. NOTA: E potret ta di archivo di NoticiaCla dia cu ex minister Paul Croes a presenta na e regie zitting.