Ploegnan instala pa drecha careteranan den mal estado despues di yobida

ORANJESTAD - Riba peticion di Minister encarga cu infrastructura Otmar Oduber, DOW a pone ploegnan riba caminda pa cumpli cu diferente reparacion di careteranan prome cu e temporada di fin di aña. Cu enfoke special riba careteranan di santo cu a keda den sumamente mal estado despues di yobida, director di DOW Marlon Croes a trece dilanti den un conferencia di prensa.

E temporada di awacero a molestia hopi di nos infrastructura, hopi buraco a aparece den asfalt y tambe camindanan di santo den diferente bario a sufri hopi daño. Minister Otmar Oduber a expresa hopi preocupacion pa e infrastructura di Aruba pa cual conhuntamente a traha riba un plan pa por atende cu e retonan aki. Cu enfoke special riba e camindanan di santo. Considerando cu ta drentando den temporada di pasco y aña nobo, e meta ta pa casnan tin bon infrastructura nan dilanti, sr. Croes a enfatisa. 

E trabounan ya a inicia y a mobilisa cu gran cantidad di truck y 35 ploeg. Lo bay ta trahando riba e camindanan di santo pa percura cu nan ta den bon estado pero tambe lo patch cierto camindanan di asfalt. Tur esakinan ta a base peticionnan/ kehonan di cu e caminda ta den mal condicion cu ta ricibi via diferente plataforma. Pa cual a traha riba e plan pa soluciona e retonan aki y pa asina comunidad por keda satisfecho cu e trabounan. ‘Mester menciona cu no ta tur trabou por tuma luga na mes momento, pues a traha riba un lista di situacionnan cu tin prioridad.’

Areanan cu ta bay cuminsa traha riba dje e siman aki ta di Wayaca Falls te cu Seroe di Mahuma, tambe den e area di Boegoeroei, Ponton y trabou di asfalt na Caya Jose Geerman na San Nicolas. Lo publica e planificacion di e trabounan riba e pagina di Facebook di DOW pa comunidad por mira den cua bario e trabounan ta tumando luga segun e simannan ta transcuri.