Xander Bogaerts a topa su tata bek na Los Angeles despues di 23 aña

LOS ANGELES – Un ‘misterio’ a keda resolvi e siman aki pa hopi hende cu conoce e pelotero professional di Aruba Xander Bogaerts. E misterio di ‘ken ta tata di Xander’. For di tempo cu a conoce Xander, tabata conoce cada bes mas di dje, ken su mama ta, cu e tin un ruman morocho y un ruman muher mas grandi. Pero semper a keda e pregunta, ken ta tata di Xander, ya cu e mama ta carga fam Brown, y Xander Bogaerts. E siman aki danki na un raportahe di Bleacher Report, e misterio a keda resolvi. Xander su tata ta na bida, y ta biba na Hong Kong. Mas importante, e siman cu a pasa, Xander a wak su tata bek personalmente despues di 23 aña. 

PROCESO

Xander a wak su tata ultimo biaha ora cu e tabatin 3 aña, esta 23 aña pasa. Ultimo añanan tabatin intento pa e acercamento tuma lugar pero tur cos a bay segun tempo. E prome cu a topa bek cu e tata, tabata Chandra e yiu muher mayor cu ta biba na Hong Kong. E di dos cu a haya contacto cu e tata tabata e ruman homber morocho Jair. Pero Xander no tabata cla ainda. Finalmente e aña aki, prome cu e serie mundial, Xander a tuma contacto cu e tata y su casa Lourdes, pa nan bin wak e parti di wega di Serie Mundial na Los Angeles. Ta durante e siman ey, Xander a topa cu su tata atrobe, cual encuentro a bay hopi bon. Xander a topa, come y mira e tata y a pordone pa tur cos cu lo por a bay malo, y a inicia un relacion nobo cu su tata. Tanto Xander como Jair ta carta parti di e nomber di e tata, esta XanderJan Bogaerts y Jair Maarten Bogaerts. Ta ora cu e mama tabata rabia so, nan tabata tende e nombernan completo asina. Lesa e storia completo AKI, cortesia di Bleacher Report. Fotonan cortesia Jair Bogaerts.