Oduber: Gobierno organisando algo grandi pa yegada di Xander Bogaerts

ORANJESTAD - No tin fecha ainda pa yegada di Xander Bogaerts. Asina minister di deporte Dangui Oduber a bisa NoticiaCla den forma di primicia diaranson mainta. “ Pero gobierno di Aruba a instala un comision cu ta organisando algo sumamente grandi pa Aruba su orguyo” e mandatario a sigura e portal. Segun Oduber, e comision aki ta den contacto cu e famia y tambe e fundacion Dare to Dream pa asina coordina na e mihor manera y tambe cumpli cu deseonan di Xander. 

CELEBRACION NACIONAL

E lo bira un celebracion nacional pa asina hunto por uni e pais aki y celebra en conhunto un logra asina grandi y historico. “ E logro di Xander pa su mes y pa su pais Aruba ta hopi grandi y nos mester dune e reconocimiento cu e merece. Di parti oficina di turismo tambe nos ta bezig cu diferente campanjanan den media na Boston awe” Oduber a sigui bisa

EMBAHADOR 

E mandatario a bisa cu Xander sigur ta wordo considera un embahador pa nos pais y e promocion cu e la haci y ta haciendo ta algo impagabel.  “Nos como gobierno lo informa communidad ki dia e celebracion grandi akk lo tuma lugar” Oduber a finalisa bisando. 

SERIE MUNDIAL

Diadomingo ultimo, Boston Red Sox a titular campeon mundial di Serie Mundial cu Xander Bogaerts como parti di e ekipo. Cu esaki, Xander ta logra su di dos renchi, cu ta e artefacto mas codicia den mundo di baseball professional, esta e renchi di serie mundial. Awe mainta Xander a participa den e parade di Victoria na Boston.