Localidad pa e actividad Island Takeover Festival ta cla

ORANJESTAD - Diamars atardi prensa di Aruba a sera conoci cu localidad di e actividad principal di Island Takeover Festival. Esaki a sosode durante un rueda di prensa cu Eric Clement di Elite Productions y Mark Benson Denz den e team di mercadeo y relacionan publico. Aki a comunica e ultimo desaroyonan rond di e festival cu ta cuminsa diahuebs awor y ta sigi te cu diadomingo 4 di November 2018.

VENUE

E trabounan den Harbor Arena ta avansando den un forma hopi acelera y por mira cu e pruebanan di luz, sonido y efectonan special ja a start. Pa loke ta trata e team di decoracion cual porcierto a bini for di Hulanda tambe ta trahando dia y anochi pa por cumpli cu e meta. E meta ta di prensa algo cu pa promer biaha nos a mira na Aruba. Aki ta papiando di pixel mapping y tambe otro efectonan inovativo.

BUSCA BANCHI

Tur persona cu a cumpra nan pass of e-pass ta wordo pidi pa por pasa e Pop Up Store di Island TakeOver for di awe diaranson of na Renaissance Hotel pa busca nan banchi. E pass lo wordo cambia pa un banchi pa ful e fin di siman. Si no logra pasa na e localidadnan aki por hacie na e evento tambe, pero e proceso lo bay mas liher si hacie adelanta. Pop Up Store ta habri diaranson y diahuebs di 1 pa 9 pm, diabierna 10 am pa 4 pm y diasabra 12 pm pa 4 pm.  Na Renaissance Marina Hotel Lobby : Diahuebs 1  - 9 pm, Diabierna 10 am – 9 pm y Diasabra 12 pm – 9 pm. 

TOKEN Y PARKING

E evento lo ta usando tokens pa cumpra bebida y cuminda. Esaki tambe lo por wordo cumpra adelanta na e Pop Up Store situa den Renaissance Market Place. Cada token tin un costa di 3 florin. Pa loke ta parkeo, lo tin e oportunidad di para auto paden di e tereno di APA. Esaki lo tin un costo di 10 florin pa auto.