Na December Corte ta dicidi si ta revoca suspension di pago di InselAir

WILLEMSTAD – Corte lo dicidi destino di Insel Air International dia 4 di December proximo. Asina huez a determina den un caso cu a tuma lugar diamars na Corsou riba e tema di suspension di pago (surseance van betaling) y e situacion actual di e compania. Manera cu NoticiaCla a raporta diamars caba,  un posibel deal di e compania interCaribbean pa cumpra InselAir, tin e compania na bida ainda. Esaki pasobra e compania no a cumpli cu e dos puntonan stipula pa corte, cu a dune ‘suspension di pago’ na augustus. Diamars corte a dicidi cu pa 4 di December awor, lo dicidi e destino di InselAir y si nan ta keda cu e proteccion of no. 

E CASO

Corte a dicidi diamars cu dia 4 di December lo trata e oferta cu e compania interCaribbean ta poni pa entrega na Insel Air. Ayera NoticiaCla a raporta cu e detayenan no ta cla ainda y como tal no por a publica e posibel acuerdo di compra di Insel Air. Pero ta e deal aki tin e compania local na bida ainda, pasobra e ta brinda e prospecto cu e compania por sali di su problemanan si e compra sigui. Pues basa riba e informacion ey, Corte a dicidi diamars cu dia 4 di December awor pa 3’or di atardi, lo trata e ‘oferta’ aki y lo dicidi riba e acuerdo aki. Corte tambe a dicidi, cu pa e fecha ey, si interCaribbean no haci e oferta of si e oferta no keda acepta, lo dicidi e momento ey riba e revocacion di e suspension di pago. Esey ta nifica cu e dia ey ta dicidi si e proteccion ta kita, cu por resulta den bancarota di e compania e momento ey. Por lesa e decision AKI.