Hyacintha Thijsen: Gobierno lo paga bashie premie y gelijkbedrag atrobe

ORANJESTAD – Gobierno lo paga pensionadonan gelijkbedrag y bashie premie e aña aki ainda. Esaki ta e loke cu sra Hycintha Thijsen a logra cu su manifiesto y e ta contento. E manifiesto a pidi pa reduccion di tarifa di coriente, pero esey si no a logra. “Por lo menos mi no a bin man bashi” e la bisa su simpatisadornan. “E otro asunto nan ta negoshando y a priminti cu nan lo sigui negosha cu Valero” Thijsen a bisa e grupo di persona cu a acompañe. Sinembargo e grupo no tabata mucho contento cu e logro ey ‘solamente’. “Nos kier mas” algun a grita. “Mi a bin busca tur locual mi por a haya” Thijsen a bisa. “Ora bo negosha, bo no ta haya tur cos. Algo ta algo”. “Mi a sali contento di e reunion”

E reduccion di tarifa di coriente di 15% si no a logra. “E ta den negoshacion. Nan a bisami. Sr Eman a bisami cu ta WEB ta esun cu mester negosha”. E grupo di simpatisante, a exigi cu nan tabata kier e promesa di e gelijkbedrag y bashie premie den un carta preto riba blanco. “Bo palabra no ta bal” un señora a grita den direccion di Thijsen, mustrando cu e kier algo mas sigur.

E resultado di diabierna ta e esfuerso di Thijsen di diaranson, ora cu a pidi pa entrega un manifiesto contra tarifa di coriente y mas punto. Durante e protesta ey, a exigi di prome minister Eman pa e haya un contesta mas lihe cu ta posibel. Riba insistencia di Thijsen, e la haya promesa cu diabierna atardi esaki lo por ta cla. Contrario na diaranson ora cu tabatin un incidente ora cu simpatizantenan di gobierno a cuminsa parti pamfleta rond, e actividad di diabierna a bay mucho mas trankil.