Wever: Gobierno hamas lo malusa ministerio publico pa silencia prensa

ORANJESTAD – “ Nos gobierno no a, no ta y lo no interferi den investigacionnan y hamas lo malusa ministerio publico pa silencia prensa”. Asina prome minister Evelyn Wever Croes a reacciona pa NoticiaCla diaranson mainta riba e tema di e tres periodistanan deteni.  “Nos no por tampoco pasobra ministerio publico ta traha independientemente” e mandatario a sigui bisa. Segun e mandatario, su gobierno ta duna prensa su lugar y su reconocemento y hamas lo trapa e derecho aki. “ Nos a demostra esaki den e 11 lunanan cu nos ta den gobierno” Wever a sigui bisa. 

CASO PENAL

E mandatario a sigui bisa cu den e caso aki tin un investigacion penal andando. “ Mi no conose e detayes y mi no ta suppose di conose e detayes tampoco pasobra Ministerio Publico ta actua independiente”. Den casonan asina tin procedura legal pa cana y esnan cu a wordo deteni na canando nan proceduranan.“ Mi tin confiansa nos sistema hudicial lo funciona y cu husticia lo vence” e mandatario a finalisa bisando.

 E CASO

E caso en cuestion ta regarda e hecho cu 3 periodista a keda deteni diamars marduga sospecha di ta envolvi den robo y posecion di radio di polis of portafoon. A detene nan tres, inicialnan M.E, R.T y M.T.L, y tur tres a keda encarcela despues di nan prome session di interogacion, pa por lo menos 2 dia. Si keda cla cu nan prome cu esey, nan por recobra nan libertad pendiente e investigacion of por prolonga e detencion cu 8 dia mas. Un abogado (Chris Lejuez) a confirma detencion di su cliente M.E. y encarcelacion pa e 2 dianan aki.