Posibel deal cu interCaribbean tin InselAir na bida ainda

WILLEMSTAD – Un posibel deal den tapara cu e aeroliña interCaribbean tin e aeroliña Insel Air na bida ainda. Por lo menos segun e ultimo rapport di curator riba e caso di ‘suspension di pago’ (surseance van betaling) di dia 29 di october 2018. Segun e rapport, ainda Insel Air no ta cumpliendo cu dos di e exigencianan pa cu e condicion di suspension di pago. Pero un posibel deal di compra, ta mustra como un posibel solucion real pa e compania sali di e situacion di debe. Condicion ta si cu pa fin di November un reunion di creditornan mester concretisa e deal aki, pasobra e situacion di InselAir no por wordo wanta mucho largo.

CUMPLI 

E aeroliña a haya varios condicion impone riba dje pa cumpli cu ne, pero no a logra. Entre nan, cu Insel Air mester por cumpli cu tur obligacionan fianciero entre otro pago di impuesto pendiente y e termino di lease. Tambe e debenan crea durante e period di suspension di pago te cu augustus 2018 mester wordo cancela. Algo cu no a sosode ainda. 

INTERCARIBBEAN

Loke tin Insel Air na bida, ta e combersacionan avansa cu interCaribbean, cu a resulta den un oferta cu tin bista riba un benta di Insel Air pa un suma cu ta cuadra cu e creditornan y e balor real di e compania. E oferta aki a haya un forma di ‘heads of agreement’. Pero ainda ta negoshando algun detayes prome cu por haci e acuerdo aki publico. Lesa e resultado di e rapport AKI.