Aruba ta participa den ‘Global Children’s Designathon’

ORANJESTAD - Den e di cuater edicion di “Global Children’s Designathon” cu lo tuma lugar riba diasabra 3 di november. Durante e dia aki hopi special, 1.000 mucha rond di mundo di 30 cuidad, di Melbourne pa Bogota, y di Amsterdam pa Johannesburg, lo traha parelelo pa diseña solucionnan creativo pa deforestacion, cu ta forma parti di e “Sustainable Development Goal” numer 15: Bida riba Tera. 

Na Aruba, e marathon aki lo tuma lugar na International School of Aruba. Muchanan lo cuminsa nan dia cu estudio riba deforestacion na Aruba y consecuencia di polucion di aire, especienan den peliger, como tambe destruccion di naturalesa riba tera. E di dos fase di e dia aki, e muchanan lo sketch y trece nan idea na bida, dor di crea prototiponan di nan idea usando materialnan recicla, motornan chikito, micro-bits, lusnan Led, sensors y otro materialnan.

Pa medio di internet, e muchanan lo ta den contacto cu ekiponan di otro pais y nan lo presente nan idea na expertonan local, mayornan y public invita. E proceso ta basa riba e Designathon Method, cu ta un metodo di educacion pa siña muchanan rond di mundo pa usa nan creatividad y diseña nan futuro dor di hasi uso di tecnologia. E methodo ta combina “Design Thinking” y “Makers education”, cual tur dos methodo ta hañando mas acojida rond di mundo den e sistema di educacion.

Muchanan rond di mundo ta preocupa cu nos sociedad y e futuro di nos tera. E ideanan inovativo cu muchanan ta trece pa dilanti tocante e tema por ta uno hopi valioso. Ta asina cu hasta den pasado ideanan a wordo adopta dor di companianan den consultacion cu e diseñadornan hoben cu a wordo desaroya den servicionan of productonan. E di cuater Global Children’s Designathon ta un iniciativa di Designathon Works y ta wordo presenta na Aruba dor di su Partner HopeAruba Movement Foundation.

Global Children's Designathon ta wordo apoya dor di e cuidad di Amsterdam, Patagonia, Bugaboo, Talud, Yoxi, Chocolonely Foundation, Conservation International, WWF, PWC, World Largest Lesson y  Expo Live.