Prome minister a felicita Xander Bogaerts cu e logro di titulo Mundial

ORANJESTAD – “Nos ta habri un siman den un forma hopi alentador y alegre naturalmente despues di a mira nos rubiano Xander Bogaerts hiba su ekipo Boston Red Sox na e campeon di World Series”. Esey tabata e forma con prome minister di Aruba Evelyn Wever Croes a habri e conferencia semanal di gobierno dialuna mainta. “Naturalmente e ta yenabo cu hopi alegria, hopi orguyo. Y di kinan un pabien na Xander y su famia” Wever a bisa. Mientrastanto minister di deporte Dangui Oduber a confirma dialuna tambe pa NoticiaCla cu gobierno ta hacienda preparacion pa celebra e logro aki. “ Sigur cu lo haci algo special pa ricibi Xander. E ta un logro historico cu sigur merece atencion di gobierno y nos tur cu ta biba riba e pais aki” Oduber a bisa brevemente den un reaccion pa NoticiaCla. E fecha no ta conoci ainda y no ta conoci ki dia lo celebra esaki. Mes momento por bisa cu atencion di prensa internacional tabata grandi. Pero porta esun mas interesante tabata e entrevista cu comentaristanan di Fox Sports, A-Rod (Alex Rodriguez) y Big Papi (David Ortiz) a tene cu Xander despues di e wega. Potretnan ta screen shots di e entrevista na Fox Sports.